ج. ايتجانوۆا: قازاقستاننىڭ دۇنيەجۇزىلىك ساۋدا ۇيىمىنا ءوتۋ شارتتارىن راتيفيكاتسيالاۋىمىز قاجەت
بۇل تۋرالى قازاقستاندىق ب ا ق وكىلدەرىنە سۇحبات بەرگەن ق ر ەكونوميكالىق ينتەگراتسيا ىستەرى جونىندەگى ءمينيسترى جانار ايتجانوۆا ءمالىم ەتتى.
«ەلىمىزدىڭ پرەزيدەنتى دۇنيەجۇزىلىك ساۋدا ۇيىمى باس كەڭەسىنىڭ وتىرىسىندا قازاقستاننىڭ اتالعان ۇيىمعا ءوتۋى جونىندەگى كەپىلدەمە حاتتاماعا قول قويدى. ەندى ءبىز ەلدە سول حاتتامانى جانە قازاقستاننىڭ د س ۇ- عا ءوتۋ شارتتارىن راتيفيكاتسيالاۋىمىز قاجەت. ارينە، كەلىسسوزدەردىڭ ۇزاقتىعى مەن كۇردەلىلىگى ەلىمىزدىڭ ۇلتتىق ەكونوميكاسىنىڭ باسىمدىقتى سالالارىن قورعاۋ ءۇشىن ورىن الدى. ءبىزدىڭ زاڭدارىمىزدى ءارى ەكونوميكالىق ساياساتتا جۇرگىزىپ جاتقان تەتىكتەرىمىزدى د س ۇ شارتتارىمەن سايكەستەندىرۋ بويىنشا جۇمىس جاسالدى»، دەپ اتاپ ءوتتى ج. ايتجانوۆا.
ءمينيستردىڭ ايتۋىنشا، قازىرگى ۋاقىتتا قازاقستاندى قوسپاعاندا ۇيىمعا مۇشە 161 مەملەكەت ءبىرىڭعاي ساۋدا شارتتارىمەن، ءبىرىڭعاي ساۋدا زاڭدارىمەن جۇمىس ىستەۋدە.
«سوندىقتان د س ۇ- عا كىرۋىمىز ءبىزدىڭ ەكونوميكامىزدىڭ ارى قاراي دامۋى، باسقا ەلدەردىڭ ەكونوميكاسىمەن تەپە-تەڭ قابىلدانۋى ءۇشىن وتە قاجەتتى دە مازمۇندى قادام بولدى. بۇل جايىندا ءبىزدىڭ پرەزيدەنتىمىز نۇرسۇلتان ءابىش ۇلى نازاربايەۆ تا د س ۇ- نىڭ باس كەڭەسى وتىرىسىندا ايتقان بولاتىن»، - دەدى ول.
ايتا كەتەيىك، كەشە دۇنيەجۇزىلىك ساۋدا ۇيىمى باس كەڭەسىنىڭ وتىرىسىنىڭ قورىتىندىسىندا ق ر پرەزيدەنتى نۇرسۇلتان نازاربايەۆ پەن د س ۇ باس ديرەكتورى روبەرتو ازيەۆەدو قازاقستاننىڭ دۇنيەجۇزىلىك ساۋدا ۇيىمىنا قوسىلۋى تۋرالى حاتتاماعا قول قويعان ەدى.
اۆتور: مارلان جيەمباي
