ن. نازاربايەۆ شەتەلدىك ينۆەستورلار ءۇشىن قازاقستانداعى جەڭىلدىكتەر مەن پروفەرەنتسيالاردى اتادى

جەنەۆا. قازاقپارات - بۇگىن دۇنيەجۇزىلىك ساۋدا ۇيىمى باس كەڭەسىنىڭ وتىرىسىندا ەلباسى نۇرسۇلتان نازاربايەۆ شەتەلدىك ينۆەستورلار ءۇشىن قازاقستانداعى جەڭىلدىكتەر مەن پروفەرەنتسيالاردى اتادى.

«ينۆەستيتسيالىق احۋالدى جاقسارتا وتىرىپ، ءبىز ەكونوميكامىزدى ءارتاراپتاندىرۋعا باسىمدىق بەرەمىز. ينۆەستيتسيا مۇناي گاز جانە تاۋ كەن سەكتورىنا عانا ەمەس، سونىمەن بىرگە ەكونوميكانىڭ وڭدەۋشى سالاسىنا دا باعىتتالۋى ءۇشىن بارلىق جاعداي جاسالعان. وڭتايلى كونيۋكتۋرا كەزىندە بولاشاق ۇرپاق ءۇشىن ارنايى قور قۇرىپ، شامامەن 100 ميلليارد ا ق ش دوللارىن جينادىق. ەندىگى ۋاقىتتا ءبىز ونى بالاما ەكونوميكا قۇرۋعا باعىتتاۋدامىز. باسىمدىقتى سالاعا قارجى سالاتىن ينۆەستورلار ون جىلعا كورپوراتيۆتىك تابىس جانە جەر سالىقتارىنان، ال مۇلىك سالىعىنان سەگىز جىلعا بوساتىلعان. يندۋستريالىق باعدارلامانى ورىنداي وتىرىپ، العاشقى بەسجىلدىقتا ءبىز جاڭا 770 كاسىپورىن سالدىق. تەك اعىمداعى جىلى تاعى 70 كاسىپورىن ىسكە قوسىلاتىن بولادى. ەكىنشى بەسجىلدىقتى باستاۋدامىز. وندا ءبىز قارجىمىزدى تەك يننوۆاتسياعا باعىتتايتىن بولامىز»، - دەدى ن. نازاربايەۆ.

سونىمەن قاتار مەملەكەت باسشىسى ەكونوميكانىڭ باسىمدىقتى سالالارىنا قارجى قۇيۋعا ىنتالى شەتەلدىك ينۆەستورلارعا قازاقستان ۇسىناتىن وزگە دە جەڭىلدىكتەر مەن پرەفەرەنتسيالار جايىندا تارقاتا ايتىپ بەردى. ونىڭ ىشىندە الەمنىڭ جيىرما ەلىنىڭ بيزنەسمەندەرىنە ۆيزاسىز رەجىم ەنگىزۋ دە بار.

مۇنان بولەك ق ر پرەزيدەنتى قازاقستاننىڭ بارلىق ەلدەرىمەن ىنتىماقتاستىققا اشىق ەكەندىگىن باسا ايتتى ءارى ونى ەلىمىزدىڭ پوسكەڭەستىك كەڭىستىكتە ەڭ ءبىرىنشى بولىپ ەكسپو-2017 كورمەسىن وتكىزۋ مارتەبەسىن جەڭىپ الۋى قۋاتتاي تۇسەتىندىگىن اتاپ ءوتتى.

اۆتور: مارلان جيەمباي