استانا اۋەجايىنىڭ وكىلدەرى گەننادي گولوۆكيننەن كەشىرىم سۇرادى
ماركەتينگ جانە قوعاممەن بايلانىس بولىمىندەگىلەردىڭ ايتۋىنشا، VIP زالىنداعى جولاۋشىلار مەن باگاجدارعا قىزمەت كورسەتۋ بويىنشا باسشىلىقتىڭ تالاپتارىن ورىنداماعان، جولاۋشىلارعا قىزمەت كورسەتۋ قىزمەتىنىڭ جۇمىسشىلارىنا تارتىپتىك جازا قولدانىلدى.
«بولعان وقيعاعا بايلانىستى استانانىڭ حالىقارالىق اۋەجايىنىڭ اكىمشىلىگى گولوۆكين مىرزادان كەشىرىم وتىنەدى»، - دەدى ماركەتينگ بولىمىندەگىلەر.
ەسكە سالا كەتەيىك، 2015 -جىلدىڭ 24 -شىلدەسى كۇنى ليۋفتگانزا اۋە كومپانياسىنىڭ فرانكفۋرت- استانا رەيسىمەن قازاقستاندىق بوكسشى گەننادي گولوۆكين ەلوردا اۋەجايىنا ۇشىپ كەلدى.
«بۇعان دەيىن اۋەجايعا تەلەفون ارقىلى ءوتىنىم كەلىپ ءتۇستى، وندا گولوۆكين مىرزاعا قىزمەت كورسەتۋ، ياعني VIP زال ارقىلى، الدىن الا تولەمسىز ۇشىپ كەلۋ تۋرالى ايتىلعان. VIP زالىندا جولاۋشىلار مەن باگاجدارعا قىزمەت كورسەتۋ نۇسقاۋلىعى بويىنشا قىزمەتتىڭ بۇل ءتۇرى اقىلى بولىپ تابىلادى. تولەمدى ۇشىپ كەلگەنگە دەيىن كەز كەلگەن ۋاقىتتا جۇزەگە اسىرۋ كەرەك. تولەم بارلىق تۇلعالاردان تالاپ ەتىلەدى، تەك قازاقستان رەسپۋبليكاسىنىڭ، شەت مەملەكەتتەردىڭ لاۋازىمدى جانە قورعالاتىن تۇلعالارىنىڭ تىزىمىندە كورسەتىلگەندەر مەن استانا اۋەجايىنىڭ VIP زالىندا جەڭىلدەتىلگەن تاريفتى قولدانۋشىلاردان تالاپ ەتىلمەيدى»، - دەپ ءتۇسىندىردى اۋەجايداعىلار.
ماركەتينگ بولىمىندەگىلەردىڭ ايتۋىنشا، اۋەجاي تاراپىنان VIP زالدا قىزمەت كورسەتۋشى اگەنت قوناقتى كۇتىپ الۋ مەن قىزمەت كورسەتۋدە قاتەلىك جىبەرگەن. ول تولەمگە قاتىستى جاعدايدى انىقتاماعان. «ءوتىنىم بەرۋشىنىڭ الدىن الا تولەم جاساماۋى مەن اگەنتتىڭ قاتەلىگىنەن كەلەڭسىز جاعداي تۋىندادى»، - دەيدى اۋەجايداعىلار.
بۇعان دەيىن ب ا ق- تا «استانا» حالىقارالىق اۋەجايى قىزمەتكەرىنىڭ جولاۋشىلار مەن كۇتىپ الۋشىلار الدىندا جانجال ۇيىمداستىرىپ، گولوۆكيندى VIP زال ارقىلى وتكىزگىسى كەلمەگەنى تۋرالى اقپارات پايدا بولدى.
ب ا ق مالىمەتىنشە، اۋەجاي قىزمەتكەرى «گولوۆكين اقىسىن تولەمەي تۇرىپ، زال ارقىلى وتە المايدى، سەبەبى ول «شەنەۋنىك نەمەسە ونىڭ وتباسىنىڭ مۇشەسى ەمەس» دەگەن، بۇعان ول جەردەگىلەردىڭ بارلىعى تەرىس كوزقاراس ءبىلدىردى، ولار قازاقستاننىڭ يميدجىن شەتەلگە تانىتىپ جۇرگەن ادامعا كورسەتىلگەن وسىنداي قارىم- قاتىناسقا نارازىلىقتارىن ءبىلدىردى.
ايتا كەتەيىك، گەننادي گولوۆكيننىڭ قورجىنىندا 33 جەڭىس بار، ونىڭ وتىزى - نوكاۋت. 17 -قازاندا گولوۆكين IBF تۇجىرىمى بويىنشا ورتا سالماقتا الەم چەمپيونى، كانادالىق داۆيد لەمەگە قارسى رينگكە شىعادى.
