س. احمەتوۆتىڭ قىلمىستىق ءىسى بويىنشا الدىن الا تىڭداۋ باستالدى

قاراعاندى. قازاقپارات - قاراعاندى وبلىسى مامانداندىرىلعان اۋدانارالىق سوتىندا بۇرىنعى پرەمەر-مينيستر سەرىك احمەتوۆ پەن سىبايلاس جەمقورلىق ءۇشىن ايىپتالىپ وتىرعان ايماقتىڭ بۇرىنعى جوعارى شەندى شەنەۋنىكتەرىنە قاتىستى قىلمىستىق ءىس بويىنشا الدىن الا تىڭداۋ باستالدى.

بۇل تۋرالى «قازاقپارات» ح ا ا- ءنىڭ ءتىلشىسى حابارلايدى.

ەسكە سالا كەتەيىك، ءىس بويىنشا 21 ادام ايىپتالۋدا.

س. احمەتوۆكە جانە باسقا دا قاتىسۋشىلارعا قاتىستى قىلمىستىق ءىس قاراعاندى وبلىسىنىڭ مامانداندىرىلعان اۋدانارالىق سوتىنا 2015-جىلعى 13- شىلدەدە كەلىپ ءتۇستى. 14- شىلدەدە ول تىركەلىپ، ءاربىر سوتتالۋشىعا ستاتيستيكالىق كارتوچكا اشىلدى. اۆتوماتتى تاسىلمەن قىلمىستىق ءىستى سۋديا يسلامحان ەسەنبايەۆ قارايتىن بولدى.

بۇعان دەيىن قاراعاندى وبلىستىق پروكۋراتۋراسى حابارلاعانداي، باقىلاۋ ورگانى بۇرىنعى پرەمەر-مينيستر س. ن. احمەتوۆكە، وبلىستىڭ ەكس-اكىمى ب. ت. ابدىشيەۆكە، قاراعاندى قالاسىنىڭ ەكس-اكىمى م. ا. سماعۇلوۆقا جانە باسقا دا بۇرىنعى شەنەۋنىكتەر مەن كاسىپكەرلەرگە قاتىستى قىلمىستىق ءىس ماتەريالدارىن زەردەلەۋدى اياقتادى. سىبايلاس جەمقورلىق ءىسى بويىنشا بارلىعى 21 ادام تەرگەلۋدە. ولارعا قىزمەت بابىن اسىرا پايدالاندى، بيۋجەت قاراجاتىن ۇرلادى جانە كاسىپكەرلىك قىزمەتكە زاڭسىز ارالاستى دەگەن ايىپتار تاعىلعان. س. احمەتوۆ سونداي-اق اسا ءىرى كولەمدە پارا الۋعا ايىپتالۋدا. قىلمىستىق ءىس ماتەريالدارى 300 تومنان اسادى.

تەرگەۋ نۇسقاسى بويىنشا، س. احمەتوۆ 1 ميلليارد تەڭگەدەن استام بيۋجەت قاراجاتىن جىمقىرىپ، 2,4 ميلليون ا ق ش دوللارى كولەمىندە پارا الدى دەگەن كۇدىك بار.