قازاقستاندا جاقىن ارالىقتا بەنزين مەن ديزەلدىك وتىن قىمباتتامايدى

استانا. قازاقپارات - جاقىن ارالىقتا قازاقستاندا بەنزين مەن ديزەلدىك وتىن قىمباتتامايدى. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا ەنەرگەتيكا ءبىرىنشى ۆيتسە-ءمينيسترى ۇزاقباي قارابالين ءمالىم ەتتى.

بريفينگ ەلباسى ايقىنداعان «100 قادام» ۇلت جوسپارى اياسىندا جەر قويناۋىن پايدالانۋ سالاسىنداعى ىلگەرى رەفورمالار تاقىرىبىندا وتكەن بولاتىن.

ۆيتسە-ءمينيستردىڭ ايتۋىنا قاراعاندا، نەگىزىنەن قازاقستاندا جانارماي باعاسى نەگىزىنەن كوكتەمگى نەمەسە كۇزگى ەگىس ناۋقانىنا قاتىستى ەمەس، الەمدىك احۋالعا، سونىڭ ىشىندە كورشىلەس ەلدەردەگى جاعدايعا قاتىستى وزگەرىپ وتىرادى. «ءبىز رەسەيدەن 30 پايىز مۇناي ونىمدەرىن، ياعني بەنزين مەن ديزەلدىك وتىندى يمپورتتايمىز. قازىرگى تاڭدا ول تۇستا مۇناي ونىمدەرىنىڭ باعاسىنا كۇرت وزگەرىستەر بايقالمايدى. سوندىقتان دا، ەگىس ناۋقانىنىڭ جۇمىستارىنا بايلانىستى ەشقانداي باعانىڭ كوتەرىلۋى بولمايدى. ەگەر ونداي جاعداي ورىن السا دا، ول نەگىزىنەن نارىقتاعى باعانىڭ وزگەرۋى ناتيجەسىندە ورىن الۋى عانا مۇمكىن»، - دەپ ءتۇسىندىردى ۇزاقباي قارابالين.

ايتا كەتەيىك، ەلىمىزدە مۇناي ونىمدەرىنە باعانىڭ سوڭعى ءوسۋى اعىمداعى جىلدىڭ مامىر ايىندا ورىن الدى. ناقتىراق ايتقاندا، بىلتىرعى جىلدىڭ سوڭىنا تامان بەنزين باعاسى وزگەرگەننەن كەيىن، مامىر ايىندا اي-92 ماركالى بەنزين ليترىنە 99 تەڭگەدەن 108 تەڭگەگە كوتەرىلگەن بولاتىن.

اۆتور: قانات مامەتقازى ۇلى