اقتاۋلىق جاس دزيۋدوشىلار باكۋدەن ەلىمىزگە ءۇش مەدال اكەلدى

استانا. قازاقپارات - «جاستار» سپورت مەكتەبىنىڭ تاربيەلەنۋشىلەرى باكۋدە دزيۋدودان حالىقارالىق تۋرنيرگە قاتىستى، دەپ حابارلادى Sports.kz.

اقتاۋلىق دزيۋدوشىلار جاس باپكەر جومارت قوبىلانوۆتىڭ باسشىلىعىمەن ەكى اپتا بويى باكۋدەن ءۇش ساعاتتىق جەردەگى نابران كۋرورتتىق كەنتىندە جاتتىعۋدا بولدى. ارتىنشا ولار ازەربايجان استاناسىنا جارىسقا كەلدى.

تۋرنيرگە قازاقستان، رەسەي، وزبەكستان، ازەربايجان، تاجىكستان، بەلارۋس جانە گرۋزيا ەلدەرىنەن 12-14 جاس ارالىعىندا 300 گە جۋىق سپورتشى قاتىستى.

گۇلنۇر نۇرعالي قىزى كۇمىس مەدال الدى. نۇرسۇلتان ماناربەك ۇلى مەن نۇربەك قۋانىش ۇلى قولا يەلەندى. كوماندالىق ەسەپتە ماڭعىستاۋلىقتار ءۇشىنشى ورىندى ەنشىلەدى.

- جارىس جوعارى دەڭگەيدە ۇيىمداستىرىلعان. شاكىرتتەرىمە كوڭىلىم تولدى. وسى قارقىننان تانبايمىز دەپ ويلايمىن، - دەپ ويىمەن ءبولىستى باپكەر.