ءازىمباي عالي. ءتىل ساياساتىنا وكپەلەپ، مەن قازاقستاننان قاشپاق ەمەسپىن

استانا. قازاقپارات - ءازىمباي عالي، ساياساتتانۋشى؛ ەلىمىزدىڭ بەيبىت قاتار ءومىر ءسۇرۋى قازاقتىڭ دەنساۋلىعى ەسەبىنەن شەشىلمەۋ كەرەك!

مەن ورىس تىلىندە 19 جىلداي وقىپپىن. ون جىل مەكتەپتە، ءتورت جىل ينستيتۋتتا (بۇرىنعى قاز پ ي قازىرگى قاز ۇ م پ ۋ)، تاعى بەس جىل (ەكى جىل ستاجيروۆكا جانە ءۇش جىل اسپيرانتۋرا). كوپ جىل تەك قانا ورىسشا ساباق بەردىم. ورىسشا بىرنەشە كىتاپ شىعاردىم. قازىر الماتى قالاسىندا تۇرامىن.

ءبىرىنشى ەپيزود. وسىدان ەكى جىل بۇرىن جوتەلە باستاپ دارىگەرگە باردىم. دارىگەر ورىس كەلىنشەگى قازاقشا بىلمەيدى ەكەن، ال مەن جوتەلىمدى ورىسشا سيپاتتاي المادىم. قازاقشا بىلەتىن دارىگەردى سۇراپ ەدىم، سىزدەرگە باس باسىڭىزعا قازاق دارىگەر جوق دەپ ءوزى بىلەتىن دياگنوز قويىپ، اشۋىن ازەر باسا وتىرىپ ءوزى بىلەتىن دارىلەردى رەتسەپكە جازىپ بەردى. مەن دارىگەردىڭ بەرگەن ءدارىسىن ىشۋگە بارا المادىم. ايتەۋىر ، كەيىن جوتەلىم ءوزى باسىلدى.

 ەكىنشى ەپيزود. ەگيپەتكە باراتىن بولىپ «تەز - تۋر» دەيتىن كومپانياسىمەن سويلەستىم. ءبىراق ولار مەنىمەن قازاقشا سويلەسۋدەن باس تارتقاندىقتان، مەن قازاقشا تىلدەسەتىن «حيكمەت تۋردىڭ» قىزمەتىن دۇرىس كوردىم. سونىمەن قازاقشا سويلەسۋگە باس تارتقان «تەز- تۋر» بەس كليەنتتتەن ايرىلدى.

ءۇشىنشى ەپيزود. پاتەردى كۇزەتكە قويماق بولىپ سول اقىلى قىزمەتتى كورسەتەتىن فيرماعا تەلەفون سوقتىم . كەيىننەن وپەراتورلاردىڭ ءبىرى: بىزدە قازاقشا سويلەيتىن وپەراتور جوق دەپ قيىپ تاستادى. سىزگە ءبىزدىڭ ورىس ءتىلدى قىزمەتىمىز كەرەك ەمەس بولماسا باسقا فيرمانى تابىڭىز. جارايدى دەپ، دەمالىس بىتىسىمەن قازاقشا قىزمەت كورسەتەتىن فيرما ىزدەمەكپىن.

قازىرگى زاماندا اقىلى قىزمەت كورسەتۋدە، قۇدايعا شۇكىر، باسەكەلىك ورتا بار.

ولاي بولسا قازاقشا بىلمەي دياگنوز قويىپ، ءدارى جازىپ بەرەتىن شيپاگەردەن قۇتىلاتىن كەز كەلگەن سياقتى. بۇل تۇككە تۇرمايتىن پروبلەما، ونى ماسەلە قىلىپ، ماقالا جازاتىن ءجون جوق دەيتىن اعايىن از بولماس، ءبىراق مەنى ءوز ەلىمىزدە ورىسشامىز جەتپەگەندىكتەن تەرىس دياگنوزدان قاتىپ قالاتىن پەرسپەكتيۆا مەنىڭ جۇرەگىمدى جىلىتپايدى.

بۇگىنگى تاڭدا ورىس ءتىلىنىڭ تارالۋى تارىلىپ كەلەدى. كەلتىرىلگەن ەپيزودتاردا پالەن جىل ورىسشا وقىعان ءازىمبايدىڭ ءتىلى ورىسشاعا جەتپەگەن جاعدايلار بولدى. ول راس. قازاقشا بىلمەيتىن ارنايى قىزمەتتەگى ورىس پەن قازاقتى اياپ، كليەنتى پەن پاتسيەنتى قۇربان ەتەمىز بە سوندا؟

ەلىمىزدىڭ بەيبىت قاتار ءومىر ءسۇرۋى قازاقتىڭ دەنساۋلىعى ەسەبىنەن شەشىلمەۋ كەرەك. كليەنتتىڭ پاتشا كوڭىلى اقىلى قىزمەت كورسەتۋشى فيرماعا بايلانىستى بولسا، قازاق ءتىلدى كليەنت ءوز مۇددەسىنەن ايرىلماۋ كەرەك. ەڭ ماڭىزدىسى قازاق ءتىلدى كليەنتتىڭ قۇقىعى ءوز تالاپشىلىدىعى ارقىلى شەشىلۋ كەرەك پە دەپ ويلايمىن.

مەن ءتىپتى مەملەكەتتىك ءتىل تۋرالى اۋىز اشپاي وتىرمىن. «قورعاۋ» قىزمەتى فيرماسىنىڭ ءتورتىنشى وپەراتورىنىڭ ايتۋىنشا كوپ ۇلتتى قازاقستاندا كورەي تىلىندە قىزمەت كورسەتۋىمىز مىندەت ەمەس. سولاي دەلىك. ءبىراق مەن كورەي تىلىندە سويلەپ وپەراتوردىڭ باسىن اۋىرتىپ، جانىن قيناعان كليەنت ەمەس ەدىم. وپەراتور مەنىڭ تالابىمدا كليەنتتىڭ تالابى ەمەس ۇلتشىل قازاقتىڭ ورىنسىز لاڭى دەپ وتىر.

ءبىر ۇسىنىس. ءيا، قازاق ءتىلىنىڭ كەرەكتىگى ءبىر قازاقتىڭ قىرسىقتىعىنان تۋعان ماسەلە ەمەس. قازاق ءتىلى جۇرمەسە بىزگە بۇل مەملەكەتتە تۇرۋ ءجايسىز بولار. ءتىل ساياساتىنا وكپەلەپ، مەن قازاقستاننان قاشپاق ەمەسپىن. ولاي بولسا وركەنيەتتى كۇرەس جولى بار سياقتى. ول قازاق كليەنتتەرىنىڭ تولىق دارەجەلى قازاقشا قىزمەت كورسەتۋدى تالاپ ەتۋ، باسقا جاعدايدا -  قازاقشاسى بار، ساپالى قىزمەت كورسەتەتىن جەرگە تايىپ تۇرۋ كەرەك. ول جاعداي دۇكەندەرگە، شاشتارازدارعا، اسحانالارعا ءتىپتى دارىگەرلەرگە قاتىستى بولۋى مۇمكىن.

Abai.kz