زارينا دياس ناعىز ەر ادامنىڭ قانداي بولۋى كەرەگىن ايتتى
تىلشىلەرگە بەرگەن سۇحباتىندا ول ءوزىنىڭ بالالىق شاعى، اتاقتى تەننيسشىلەرمەن وتكىزگەن كەزدەسۋلەرى جايىندا، ادەبيەت پەن مۋزىكاعا دەگەن قىزىعۋشىلىعى مەن ناعىز ەر ادامنىڭ قانداي بولۋى كەرەگى تۋرالى ايتتى، - دەپ جازادى Tengrinews.kz.
«بالالىق شاقتا بۇزاقىلىق جاسايتىن ۋاقىتىم بولعان جوق. مەن تەننيسپەن اينالىستىم، ال سپورتتىڭ بۇل ءتۇرى تارتىپكە ۇيرەتەدى»، - دەدى سپورتشى. قىزدىڭ ايتۋىنشا، ونىڭ مەكتەپتەگى سۇيىكتى ءپانى تاريح بولعان. ادەبيەتكە قاتىستى، زارينانىڭ ايتۋىنشا، ول دجون گرين، مارك ليەۆي، دەن براۋن مەن وسكار ۋايلدتىڭ تۋىندىلارىن ۇناتادى.
«بيىل سەرەنا ۋيليامسپەن ويناۋدىڭ ءساتى ءتۇستى، ول ءارقاشان مەنىڭ ارمانىم بولعان. ءبىراق وكىنىشكە قاراي، كەزدەسۋدە مەن ۇزدىك ويىنىمدى كورسەتە المادىم، سەبەبى، تۋرنيردىڭ الدىندا ءبىراز سىرقاتتانىپ، مۇلدە جاتتىعا المادىم دەسەم دە بولادى. ءبىراق ول مەن ءۇشىن جاقسى تاجىريبە بولدى، ونىڭ سوققىسى مىقتى، قابىلداپ الۋ قيىن. سونىمەن قاتار، ونىڭ ەكىنشى سىزىقتان جاسايتىن سوققىسى دا كۇشتى»، - دەدى دياس.
ول ناعىز ەر ادام تۋرالى سۇراققا دا جاۋاپ بەردى. «مەن ءۇشىن ناعىز ەر ادام با؟ ول ادال، قايىرىمدى، سەنىمدى ... جانە مەنى جاقسى كورۋى ءتيىس (كۇلدى). مەن ءۇشىن ناعىز ەر ادامنىڭ كورنەكى مىسالى - ءبىزدىڭ پرەزيدەنت نۇرسۇلتان نازاربايەۆ، ال تەننيستە - رودجەر فەدەرەر»، - دەدى تەننيسشى.
