جەردىڭ ەگىزى تابىلدى
Kepler-452b اتاۋىنا يە بولعان عالامشار كولەمى سالىستىرمالى تۇرعىدا جەرمەن شامالاس ەكەن. بۇل تۋرالى NASA عارىش اگەنتتىگى رەسمي تۇردە حابارلادى.
جاڭا عارامشار ءبىزدىڭ كۇنگە ۇقساس Kepler 452 جۇلدىزىنىڭ وربيتاسىندا اينالادى. Kepler 452b جەردەن %60 عا ۇلكەن بولىپ، ءوز جۇلدىزىن 385 كۇندە ءبىر رەت اينالىپ شىعادى. ازىرگە جەر انالوگىنىڭ ناقتى سالماعى مەن قۇرامى انىقتالمادى.
«Kepler 452b - جەردىڭ ۇلكەن اعاسى. ونى زەرتتەۋ ارقىلى ءبىز ءوز عالامشارىمىزدىڭ اشىلماعان قىرلارىن تابا الامىز. بۇل عالامشاردا تىرشىلىك بولۋى ىقتيمالدان جوعارى»، - دەيدى «كەپلەر» عىلىمي ميسسياسىنىڭ جەتەكشىسى دجون دجەنكينس.
Kepler 452b اققۋ شوقجۇلدىزىندا ورنالاسقان. ول جەردەن 1400 جارىق جىلىنا تەڭ قاشىقتىقتا جاتىر. عالىمدار عالامشاردى رەسمي تىركەۋ كەزىندە اتالعان شوقجۇلدىزدا تاعى 521 ەكزوعالامشاردىڭ بار بولۋ مۇمكىندىگىن حابارلادى.
ايتا كەتسەك، «كەپلەر» ارنايى جەرگە ۇقساس عالامشارلاردى ىزدەۋ ماقساتىندا قۇرىلعان. بۇل - ازىرگە وزىندىك ميسسياعا يە عارىشتاعى جالعىز تەلەسوپ. تەلەسكوپ قىزمەتىن اتقاراتىن سپۋتنيك اتاۋى عالامشارلاردىڭ اينالۋ زاڭدىلىعىن جاساعان نەمىس ماتەماتيگى ءارى استرونومى يوگانن كەپلەردىڭ قۇرمەتىنە قويىلعان.
massaget.kz
