ءانشى مايرا مۇحاممەد قىزىنا «ورىسشا دۇرىس جازبادى» دەپ رەنجۋ اقىماقتىق ەمەس پە؟
جازعاندارىن وقىپ، سالعان سۋرەتتەرىن كورىپ تۇرامىز. ءبىر قىزىعى، مايرا سۋرەتىنىڭ استىنا ورىسشا جازسا بىردەن تالاس- تارتىس پىكىر تۋىنداي قالادى. «مايرا اپاي، ورىسشا جازباڭىزشى، ءوتىنىش» دەپ «جالىنادى» ءبىر وقىرمانى.
سونداعى ايتايىن دەگەنى، مايرا اپاسىنىڭ ورىسشا ءسوزدى دۇرىس جازباعانى. كەيدە سوزدەردىڭ ورنى اۋىسىپ كەتەدى نەمەسە تىنىس بەلگىسى دۇرىس قويىلماي قالادى. ءانشىنىڭ ءوزى: «ءوزىڭ تۇزەشى، قالاي بولادى سوندا؟» - دەپ وقىرماندارىنان سۇراپ تا الادى اراسىندا. «ورىسشا قاتە جازدىڭىز» دەپ تۋلاپ شىعاتىنداردىڭ ءبارى ءوزىمىزدىڭ قازاقتار. سول ءۇشىن جەردەن الىپ، جەرگە سالۋعا بار. وسىدان ءبىراز ۋاقىت بۇرىن 2013 -جىلى «قازاقستان ارۋى» اتانعان ايداي يسايەۆا ك ت ك تەلەارناسىنداعى ءبىر باعدارلامادا ورىسشا دۇرىس سويلەي الماعانى ءۇشىن مازاققا قالعان بولاتىن.
بۇل جاعدايعا 100 مىڭ پىكىر جازىلىپ، كادىمگىدەي ءدۇمپۋ تۋدىردى. سونداي قاتە تەرگىشتەر ەنەرگياسىن دالاعا شاشپاي، كوشەلەردەگى، دۇكەندەردەگى، جارنامالارداعى قازاقشا قاتە جازىلعان سوزدەردى نەگە جونگە سالمايدى ەكەن دەپ ويلايسىڭ.
مايرا مۇحاممەد قىزى ورىسشانى بىلاي قويعاندا، اعىلشىنشا دا، قىتايشا دا، يتاليانشا دا ەركىن سويلەيتىنىن بىلەمىز. ەندەشە وعان «ورىسشا دۇرىس جازبادى» دەپ رەنجۋ اقىماقتىق ەمەس پە؟!
قازاقشانى تازا سويلەپ، ورىسشانى شالا بىلگەندە تۇرعان ەشتەڭە جوق، ءارى- بەرىدەن سوڭ. ارينە، ءتىل بىلگەنگە نە جەتسىن، ءبىراق ورىسشا بىلمەدىم دەپ قورىناتىن زامان با قازىر! مۇنىمەن ءتىل بىلمە دەپ وتىرعان ءبىز جوقپىز، قايتا «بولساڭ، مايراداي بول!» دەپ وتىرمىز.
«ءۇش قىز»
(«اق جەلكەن» ، №7. 2015 -جىل)
