11:55, 24 - شىلدە 2015 | GMT +5
بىشكەكتە ولگەن «سودىرلاردىڭ» دەنەسى تۋىستارىنا قايتارىلمادى
استانا. قازاقپارات - قىرعىزستان ۆيتسە پرەمەر- ءمينيسترى ابدىراحمان ماماتاليەۆ بۇگىن بىشكەكتە وتكەن اپتاداعى ارنايى وپەراتسيادا مەرت بولعان حالىقارالىق ەكسترەميستىك توپ مۇشەلەرى دەلىنگەن كۇدىكتىلەردىڭ دەنەلەرى تۋىستارىنا بەرىلمەيتىنىن مالىمدەدى.
ونىڭ سوزىنشە، دۇنيەجۇزىلىك تاجىريبە بويىنشا دا مۇنداي وپەراتسيادا كوزى جويىلعانداردىڭ دەنەلەرى تۋىستارىنا بەرىلمەيدى.
شىلدەنىڭ 16 سى كۇنى بىشكەكتىڭ ورتالىعىندا جانە گەس-5 اۋدانىندا وتكەن ارنايى وپەراتسيادا «يسلام مەملەكەتى» ەكسترەميستىك ۇيىمىنا مۇشە دەگەن كۇدىكتى التى سودىردىڭ كوزى جويىلىپ، جەتەۋى ۇستالعان.
قىرعىز ارنايى قىزمەتىنىڭ مالىمەتىنشە، مەرت بولعاندار اراسىندا بىشكەك تۇرمەسىنەن قاشقان قازاقستان ازاماتى جانبولات ءامىروۆ تە بولعان جانە ول كۇدىكتى توپقا جەتەكشىلىك ەتكەن.
وپەراتسيادان سوڭ ولگەن كۇدىكتى سودىرلاردىڭ تۋىستارى مەملەكەتتىك ورگاندارعا ولاردىڭ سۇيەگىن بەرۋدى سۇراپ، قايىرىلعان.
دەرەككوز: ازاتتىق
