قازاقستاندىق كورابلدەر تەڭىز بياتلونىنا قاتىسۋ ءۇشىن جولعا شىقتى - فوتو

 استانا. قازاقپارات -  قازاقستاننىڭ اسكەري- تەڭىز كۇشتەرىنىڭ جاۋىنگەرلىك كورابلدەرى تەڭىز بياتلونىنا قاتىسۋ ءۇشىن جولعا شىقتى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.

 «ورال» جانە «سارى ارقا» ەكى زىمىران- ارتيللەريالىق كورابلى «كاسپي تەڭىزى - 2015» ءبىرىنشى حالىقارالىق بايقاۋعا قاتىسۋ ءۇشىن تىكەلەي كاسپييدىڭ رەسەي سۋ ايدىندارىنا جۇزەتىن بولادى. جولعا شىققان جاۋىنگەرلىك كورابلدەردىڭ ەكيپاجدارى، 24 -  شىلدەدە ماحاچكالا قالاسىنىڭ پورتىندا كاسپيدىڭ رەسەي جاعالاۋلارىندا بولادى.

«ءبىز بايقاۋعا ۇزاق دايىندالدىق. ءبىز ءۇشىن ول تىڭ دۇنيە، ءىس جۇزىندە مۇمكىندىكتەرىمىزدى سىناپ، قوسىمشا پراكتيكالىق تاجىريبە جيناقتايمىز» - دەيدى «سارى ارقا» كورابلىنىڭ كومانديرى كاپيتان- لەيتەنانت رۋستام ءجۇنىسوۆ.

 «كاسپيي تەڭىزى - 2015» حالىقارالىق بايقاۋى كاسپي ماڭى ەلدەرى اسكەري- تەڭىز كۇشتەرىنىڭ العاشقى سايىسى. ول 1 - تامىزدا باستاۋ الىپ، 15 - تامىزدا اياقتالادى. تەڭىز بياتلونىندا ەلىمىزدى «ورال» جانە «سارى ارقا» وتاندىق زىمىران- ارتيللەريالىق كورابلدەرىنىڭ ەكيپاجدارى، سونداي- اق تەڭىز جاياۋ اسكەرىنىڭ بريگاداسى ۇسىناتىن بولادى.

 تەڭىز بياتلونى ءۇش كەزەڭنەن تۇرادى. ءبىرىنشىسى - «كاسپيلىك قۇنان جارىسى». مۇندا تەڭىز جاياۋ اسكەرى بولىمشەلەرىنىڭ اسكەري قىزمەتشىلەرىنە بەرىلگەن باعداردى بارىنشا جىلدام ءوتۋ، تەڭىزدە جانە جاعالاۋدا نىسانالاردى ءساتتى جويۋ قاجەت.

«كاسپي كۋبوگى» اتتى ەكىنشى كەزەڭگە ءتورت ەلدىڭ سۋ ءۇستى كورابلدەرىنىڭ ەكيپاجدارى قاتىسادى. ولار بەرىلگەن باعدار بويىنشا شەڭبەردى اينالادى، شاعىن ولشەمدى تەڭىز جانە اۋە نىسانالارىن، جۇزبەلى مينالاردى جويۋ بويىنشا جاۋىنگەرلىك جاتتىعۋلاردى ورىندايدى. كەيىننەن كورابلدى زاكىر تۇراعىنا كوشىرۋدى، زاكىرگە قويۋدى، ورنەكتەۋ جالاۋلارىن قولدانا وتىرىپ، بەلگىلەردى قابىلداۋ- تاراتۋدى جۇزەگە اسىرادى. سودان كەيىن ەكيپاجدارعا كورابلدىڭ «اپاتقا ءتوزۋ» كوورديناتالارى بەرىلەدى. قاتىسۋشىلارعا وقيعا ورنىنا كەلۋ، جولاۋشىلاردى قۇتقارۋ جانە بورتقا كوتەرۋدى جۇرگىزۋ قاجەت ەتىلەدى.

 ءۇشىنشى كەزەڭ - «سپورتتىق». اسكەري قىزمەتشىلەردىڭ دەنە دايارلىعىن ايقىنداۋعا باعىتتالعان. تەڭىز جاياۋ اسكەرى بولىمشەلەرى مەن سۋ ءۇستى كورابلدەرى ەكيپاجدارىنىڭ جەكە قۇرامىنا 100 مەترگە ەركىن ستيلدە ءجۇزۋ، گىر سپورتىندا سايىسۋ، بولىمشە قۇرامىندا 5 شاقىرىمعا جۇگىرۋ، ارقان تارتۋ سەكىلدى نورماتيۆتەردى تاپسىرۋ قاجەت. بارلىق ءۇش كەزەڭ ناتيجەلەرى بويىنشا ۇزدىكتەر مەدالدارمەن ماراپاتتالادى، جەڭىمپازدار كوماندالىق سىناقتا ءبىرىنشى ورىن كۋبوگىن الاتىن بولادى.