قازاقستان مەن رەسەيدىڭ كينوماماندارى بىرىگىپ، جاڭا تەلەحيكايا ءتۇسىرىپ جاتىر
فيلم ورىس تىلىندە، 14 سەريادان تۇرادى. «جەكە شارۋا ەمەس» («نيچەگو ليچنوگو») دەپ اتالادى.
قىركۇيەك ايىندا كورەرمەنگە ۇسىنىلماق. ونى «حابار» تەلەارناسىنان كورۋگە بولادى.
جوبانى قازاقستان مەن رەسەيدىڭ بىرلەسكەن توبى جۇزەگە اسىرۋدا. رەسەيلىك تاراپ «اس ءۇي»، «انجەليكا»، «ينتەرندەر»، «ۋنيۆەر»، ت. ب. تانىمال تەلەحيكايالار تۇسىرگەن. رەجيسسەرى - ستانيسلاۆ بۋلوۆ.
كينونىڭ جەلىسى ارسەن دەگەن جاس جىگىتتىڭ ومىرىنەن ءوربيدى. ول - ەلگە تانىمال كاسىپكەردىڭ ۇلى. وزىنە سەنىمدى، اقىلدى، سىمباتتى، جىگىتتىڭ سۇلتانى. الايدا قيىنشىلىقتىڭ نە ەكەنىن بىلمەي وسكەندىكتەن، «بارلىعىن دا اقشامەن ساتىپ الۋعا بولادى» دەگەن قاعيدانى ۇستانادى.
اكەسىنىڭ دۇنيەسىنە سەنىپ وسكەن. ءبىراق كۇندەردىڭ- كۇنىندە بارلىق جيعان- تەرگەنىنەن ايىرىلادى. بۇدان كەيىن ارسەن حالىققا قىزمەت كورسەتۋ ورتالىعىندا جۇمىس ىستەيدى. جۇمىسىنداعى ارىپتەسى دينارا ەسىمدى ارۋعا عاشىق بولادى. ماحاببات سەزىمى ونىڭ ءومىرىن مۇلدە وزگەرتۋگە سەپتىگىن تيگىزەدى.
س. بۋلوۆتىڭ ايتۋىنشا، تەلەحيكاياعا تۇسەتىن اكتەرلەردىڭ كوبىسى كينو سالاسىنا جاڭا قادام باسىپ كەلە جاتقان جاستار. ولاردىڭ كوبى كاسىبي اكتەرلار بولماسا دا، فيلمدى جاقسى الىپ شىعا ءبىلىپتى.
- تەلەحيكايا مەلودراماتيكالىق كومەديا بولماق. نەگىزىنەن، كومەديا جانرىنداعى فيلمدى ءتۇسىرۋ جانىما جاقىن. ارينە، دراما، مەلودراما جانرىندا ءتۇرلى فيلم تۇسىرۋگە بولار ەدى. الايدا كوڭىل كۇيدى كوتەرىپ، ەرىكسىز كۇلدىرەتىن فيلمدى تاڭدادىم.
ەستەرىڭىزدە بولسا، بۇعان دەيىن «بازاربايەۆتار» كومەدياسى ءتۇسىرىلدى. كورەرمەندەر كوڭىلىنەن شىققان سوڭ، ەكىنشى ءبولىمىن دە تۇسىرگەن بولاتىنبىز. قازىرگى فيلمنىڭ نەگىزگى يدەياسى رەتىندە ومىردەگى بارلىق قۇندىلىقتار اقشامەن ولشەنبەيتىنىن كورسەتكىمىز كەلەدى. باس كەيىپكەردىڭ ءوز ماحابباتى ءۇشىن كۇرەسۋى جولىندا قالاي وزگەرۋىن كورەرمەندەرگە كورۋ وتە قىزىق بولاتىنىنا سەنىمىم مول، - دەدى رەجيسسەر س. بۋلوۆ.
تاعى توقتالا كەتەتىن جايت، تەلەحيكايادا قازاقستاندىق تانىمال انشىلەر شەر ءالى مەن لۋينا جانە بيبىگۇل اقتان، جانيا دجۋرينسكايا، دانيار ءالشىنوۆ سىندى اكتەرلەر وينايدى.
جادىرا پەردەباي قىزى
ايقىن- اقپارات
