مەكتەپ وقۋلىقتارى باسىپ شىعارىلماس بۇرىن قوعامدىق ساراپتاۋدان وتەدى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ق ر بىلىم جانە عىلىم مينيسترلىگى ءبىلىم بەرۋ جانە عىلىم سالاسىنداعى باقىلاۋ كوميتەتىنىڭ ءتوراعاسى سايات ءنۇسىپوۆ ءمالىم ەتتى. بريفينگتە وڭىرلەردەگى مەكتەپتەردىڭ وقۋ جىلىنا دايىندىعى تۋرالى ماسەلە قارالعان بولاتىن.
كوميتەت باسشىسىنىڭ ايتۋىنا قاراعاندا، سوڭعى ۋاقىتتا مەكتەپ وقۋلىقتارىنىڭ ساپاسىنا قاتىستى سىن ايتۋ باسەڭسي باستادى. دەگەنمەن دە، مەكتەپ وقۋلىقتارىنا ساراپتاما جۇرگىزۋدىڭ ءتارتىبى ءبىرشاما وزگەرىسكە ۇشىراعان.
«وقۋلىق ساراپتاماسى ءۇش ساتىدان وتەدى. ءبىرىنشى عىلىمي ساراپتاما، ەكىنشىسى پەداگوگيكالىق، ءۇشىنشىسى قوعامدىق ساراپتاما. بۇنداعى باستى جاڭالىق: قوعامدىق ساراپتاما ءبىزدىڭ سايت ارقىلى تىكەلەي اۆتوريزاتسيالانعان قوعام وكىلدەرىمەن جۇرگىزىلەدى. بۇل ءۇشىن وقۋلىقتىڭ جوباسى نەمەسە تولىق ماكەتى ەلەكتروندىق تۇردە ۇسىنىلىپ، ونىڭ ساراپتاماسى ءۇشىن قولجەتىمدىلىك تۇتاستاي قامتىلادى. وسى ۋاقىت ارالىعىندا ءتيىستى سايتتا اۆتوريزاتسيالانعان بارلىق ساراپشىلار ءالى باسپاعا تۇسپەگەن، مينيسترلىك بەكىتپەگەن وقۋلىق جوباسىمەن تانىسىپ، ەسكەرتۋلەرى بولسا جاساپ شىعادى. وسىلايشا، ءبىزدىڭ وقۋلىقتارىمىزدىڭ ساپاسىنا قاتىستى ەشقانداي دا سىن بولماسى ءۇشىن ءبىز قوعامدىق ساراپشىلاردىڭ كەڭ اۋقىمىن تارتۋدى كوزدەپ وتىرمىز»، - دەدى كوميتەت ءتوراعاسى س. ءنۇسىپوۆ.
اۆتور: قانات مامەتقازى ۇلى
