قازاقستاندىق كۋرسانتتار ا ق ش- تىڭ ۆەست-پوينت اسكەري اكادەمياسىنا اتتاندى
قازىرگى كەزدە ولار جوعارى وقۋ ورنىندا، اكادەميانىڭ كۋرسانتتارىمەن بىرگە تۇرىپ جاتىر، ولاردىڭ كۇندەلىكتى تىنىس-تىرشىلىگى، وقىتۋ باعدارلاماسى، دەنە جانە جاۋىنگەرلىك دايارلىعىمەن ەتەنە تانىسۋدا.
«مۇنداي ساپارلار قورعانىس ۆەدومستۆالارىنىڭ ىنتىماقتاستىعى شەڭبەرىندە جىل سايىن ۇيىمداستىرىلادى جانە ەكىجاقتى سيپاتقا يە. وسى جىلدىڭ ماۋسىمىندا ۆەست-پوينتتىڭ توعىز كۋرسانتى ءبىزدىڭ قۇرلىق اسكەرلەرىنىڭ اسكەري ينستيتۋتىندا بولىپ قايتتى. بولاشاق وفيتسەرلەر ءۇشىن مۇنداي ساپارلار ۇلكەن تاجىريبە بولىپ سانالادى.
ولار وزگە ەلدەردەن كەلگەن قاتارلاس قۇرداستارىمەن تانىسادى، بولاشاق ارىپتەستەرىمەن دوستىق بايلانىس ورناتادى، الەمدىك تاجىريبەنى، اسكەري مامانداردى وقىتۋ جانە دايارلاۋدىڭ حالىقارالىق باعدارلامالارىن زەردەلەيدى»، - دەلىنگەن ق ر قورعانىس مينيسترلىگى باسپا ءسوز قىزمەتى تاراتقان اقپاراتتا.
تاياۋ جانە الىس شەتەلدىڭ اسكەري جوعارى وقۋ ورىندارىمەن ىنتىماقتاستىق جاساۋ اسكەري كادرلاردى دايارلاۋ جۇيەسىن جەتىلدىرۋدە، قازاقستان قارۋلى كۇشتەرىن قۇرۋ مەن ساپالى دامىتۋدا ەرەكشە ءرول اتقارادى.
بۇگىندە وزدەرىنىڭ ءومىرىن اسكەري مانساپ جانە اسكەردە قىزمەت ەتۋمەن بايلانىستىراتىن وفيتسەرلەرىمىز بەن كۋرسانتتارىمىز قازاقستاندىق جوعارى وقۋ ورىندارىمەن قاتار رەسەي، بەلارۋس، ۋكراينا، ءۇندىستان، تۇركيا، وڭتۇستىك كورەيا، قىتاي جانە ۇلى بريتانيانىڭ اسكەري وقۋ ورىندارىندا وقۋعا مۇمكىندىكتەرى ءبار. قازىرگى تاڭدا 400 دەن استام قازاقستاندىق اسكەري قىزمەتشى شەتەلدە ءبىلىم الۋدا.
