الماتىداعى سەلگە قاتىستى كەلتە حات- حابارلاما تاراتۋدان باس تارتقان بايلانىس وپەراتورلارىنىڭ ماسەلەسى قارالادى
بۇل تۋرالى بۇگىن استانادا وتكەن بريفينگتە ءى ءى م توتەنشە جاعدايلار كوميتەتى ءتوراعاسىنىڭ مىندەتىن اتقارۋشى سەرىك اۋباكىروۆ ءمالىم ەتتى.
ەسكە سالا كەتەيىك، كەيبىر اقپارات كوزدەرىنىڭ حابارلاۋىنشا، قازاقستانداعى بايلانىس وپەراتورلارى حابارلامالاردى بەكىتىلگەن ءماتىننىڭ سايكەس كەلمەۋىنە بايلانىستى تاراتۋدان باس تارتقان.
«ءبىز سەلدەن قورعاۋ بوگەتتەرىنىڭ بۇزىلۋى مەن سۋ باسۋ قاۋپى جوق ەكەندىگى تۋرالى ءماتىندى تاراتايىق دەپ ەدىك، بۇدان باس تارتىلدى. ءبىزدىڭ حابارلامالارىمىز كەشىگىپ تاراتىلدى، ولاردىڭ العاشقىسى تاڭعى 4.39-دا، ەكىنشىسى تاڭعى ساعات 5.13-دا ءتۇسىپ جاتتى. بۇل جەردە نەگىزىنەن اقپاراتتاندىرۋدىڭ السىزدىگىنەن نەمەسە وسى ۋاقىت ارالىعىندا كەزەكشىلىكتە بولعان وپەراتورلاردىڭ ۇقىپسىزدىعىنان بولىپ وتىر. س م س- حابارلامالار ءبىرشاما كەشىكتىرىلىپ، سول ۇيىمداردىڭ باسشىلارى ورنىندا بولعان كەزدە عانا جىبەرىلدى»، - دەيدى ءى ءى م وكىلى.
سەرىك اۋباكىروۆتىڭ ايتۋىنشا، س م س- حابارلامالار «بيلاين»، «Kcell» ، «Tele-2» جانە «التەل» سەكىلدى بارلىق وپەراتورلارعا جىبەرىلگەن.
«جالپى، مۇنداي جاعدايدا ءبىز قولدا بار بارلىق مۇمكىندىكتى ىسكە قوسىپ، بارلىق ءتاسىلدى پايدالانامىز. سول ءۇشىن وسىنداي جاعدايدى تەكسەرىپ قاراۋ كەرەك، مۇندا قانداي دا ءبىر اقپاراتتانباۋشىلىق نە بولماسا تۇنگى وپەراتورلاردىڭ جاۋاپسىزدىعى، ۇقىپسىزدىعى ورىن الىپ وتىر. مەنىڭ ويىمشا، بۇل جەردە وپەراتورلار حابارلامالاردى جىبەرۋ ءۇشىن قارجىلىق ماسەلەلەردى العا تارتىپ وتىرعان جوق. دەگەنمەن، بۇل ماسەلەنى قارايتىن بولامىز»، - دەدى س. اۋباكىروۆ.
ونىڭ سوزىنە قاراعاندا، ەگەر كىنالارى انىقتالسا، ۇيالى بايلانىس وپەراتورلارى جاۋاپكەرشىلىككە دە تارتىلۋى مۇمكىن.
ەسكە سالا كەتەيىك، الدىن الا مالىمەتتەرگە قاراعاندا، الماتى قالاسىندا ورىن العان سەل تاسقىنى كۇننىڭ كۇرت ىسۋى سالدارىنان مۇزداقتار ەرىپ، تاۋ ىشىندەگى مورەنالىق كولدىڭ ارناسىنان سۋدىڭ اسۋىنان ورىن العان. توتەنشە وقيعا بۇگىن 23 - شىلدە كۇنى تۇنگى ساعات 03:00 شاماسىندا ورىن الىپ، كولدەگى بوگەتتىڭ بۇزىلۋىنان 40 مىڭ تەكشە مەتر سۋ اسقان. تاسقىن سۋ قارعالى وزەنىنە قۇيىپ، ودان اسقان سۋ الماتى قالاسىنىڭ ءۇش اۋدانىن ءىشىنارا باسىپ ءوتتى. سونىڭ ىشىندە ناۋرىزباي اۋدانى سەل تاسقىنىنان كوبىرەك جاپا شەگىپ وتىر.
«قازىرگى تاڭدا توتەنشە جاعدايدىڭ سالدارىن جويۋعا ءى ءى م جەكە قۇرامى مەن جەرگىلىكتى اتقارۋشى ورگاننىڭ 1196 ادامى، 160 تەحنيكا، 3 تىكۇشاق جۇمىلدىرىلدى»، - دەدى بۇگىن بريفينگ بارىسىندا سەرىك اۋباكىروۆ.
سونىمەن بىرگە قارعالى وزەنى بوگەتى ماڭىنان 898 جەرگىلىكتى تۇرعىندار قاۋىپسىز ايماققا كوشىرىلگەن. ال وقيعا ورنىندا جاعدايمەن تانىسۋ ءۇشىن ۆيتسە- پرەمەر بەردىبەك ساپاربايەۆ پەن ءى ءى م ورىنباسارى ۆلاديمير بوجكو الماتىعا ۇشىپ كەتكەن بولاتىن.
اۆتور: قانات مامەتقازى ۇلى
