سەل تاسقىنى جايلى جالعان اقپارات تاراتۋشىلار جاۋاپكەرشىلىككە تارتىلادى

الماتى. قازاقپارات - الماتىدا قارعالى وزەنىندە ورىن العان سەل تاسقىنى جايلى الەۋمەتتىك جەلىلەر ارقىلى جالعان اقپارات تاراتقان ازاماتتار جاۋاپكەرشىلىككە تارتىلادى.

بۇل تۋرالى بۇگىن الماتىدا قالاسىندا وتكەن باسپا ءسوز ءماسليحاتىندا الماتى ق. ءى ءى د باسپا ءسوز قىزمەتىنىڭ جەتەكشىسى سالتانات ازىربەك ءمالىم ەتتى.

«قازىر الماتى قالالىق ىشكى ىستەر دەپارتامەنتىندە ارنايى تەرگەۋ وپەراتيۆتىك توبى قۇرىلدى. بۇل توپ سەل تاسقىنى جايلى ۇيالى تەلەفوندار جانە الەۋمەتتىك جەلىلەر ارقىلى تاراتىلعان جالعان اقپاراتتاردى، بەينەكورىنىستەر مەن فوتوسۋرەتتەردى زەرتتەپ جاتىر. جالعان اقپاراتتاردى تاراتۋشىلاردىڭ اتى-جوندەرى انىقتالىپ، ولار جاۋاپقا تارتىلاتىن بولادى. مۇنداي جالعان اقپاراتتاردى تاراتۋ ق ر قىلمىستىق كودەكسىنىڭ 274- بابىنىڭ 2- تارماعى بويىنشا قىلمىستىق ارەكەت بولىپ تابىلادى. ياعني، زاڭ بويىنشا مۇنداي اقپاراتتاردى تاراتۋشىلارعا قاتىستى 5 مىڭ ايلىق ەسەپتىك كورسەتكىش كولەمىندە ايىپپۇل سالۋ نەمەسە 2 جىلدان 5 جىلعا دەيىن باس بوستاندىعىنان ايىرۋ جازاسى قاراستىرىلعان»، - دەدى س. ازىربەك.

سونىمەن قاتار ول قازىر سەل تاسقىنى بولعان ايماقتا قازىر پوليتسيا قىزمەتكەرلەرى جۇمىس ىستەپ جاتقاندىعىن جەتكىزدى.

«قازىر سەل تاسقىنى بولعان ايماقتا بارلىعى 500 گە تارتا پوليتسيا قىزمەتكەرلەرى قوعامدىق ءتارتىپتى ساقتاۋ بويىنشا ءوز مىندەتتەرىن اتقارىپ جاتىر. وقيعا ايماعىنا ءبىرقاتار باقىلاۋ پۋنكتتەرى ورناتىلدى. قازىرگى ساتتە قاندايدا دا ءبىر قىلمىستار نەمەسە قاراۋسىز قالعان ۇيلەردى توناۋ ارەكەتتەرى تىركەلگەن جوق»، - دەدى س. ازىربەك.

اۆتور: جاپپاربەرگەن ايبوتا