قارعالى وزەنىندە بولعان سۋ تاسقىنىنا بايلانىستى جاعداي تولىق باقىلاۋعا الىندى - الماتى قالاسى اكىمىنىڭ ورىنباسارى
بۇل تۋرالى بۇگىن ناۋرىزباي اۋدانى اكىمدىگىندە بولعان باسپا ءسوز بريفينگىندە الماتى قالاسى اكىمىنىڭ ورىنباسارى يۋري يلين ءمالىم ەتتى.
«قارعالى وزەنىندە بولعان سۋ تاسقىنى سالدارىنان الماتى قالاسىنىڭ ءۇش اۋدانى - ناۋرىزباي، اۋەزوۆ جانە الاتاۋ اۋدانىندا ورنالاسقان ءبىرقاتار تۇرعىن ۇيلەردى سۋ باستى. الاتاۋ اۋدانىنا قاراستى العاباس كەنتىندە 97 ءۇيدىڭ اۋلاسى سۋ استىندا قالدى. ءبىراق ۇيلەرگە ەشقانداي زاقىم كەلگەن جوق. قازىر جاعداي تولىق باقىلاۋعا الىندى. قارعالى وزەنىنىڭ سۋ دەڭگەيى بەسەڭدەگەن سوڭ، سۋ تاسقىنىنان كوپ زارداپ شەككەن ناۋرىزباي اۋدانىندا ورنالاسقان تۇرعىن ۇيلەردى ارالاپ، كەلتىرىلگەن شىعىنداردى ەسەپتەيمىز»، - دەدى ءوز سوزىندە الماتى قالاسى اكىمىنىڭ ورىنباسارى يۋري يلين.
قالا باسشىسىنىڭ ورىنباسارى سونىمەن قاتار سەلدىڭ سالدارىن جويۋ جۇمىستارىنا جەرگىلىكتى اتقارۋشى ورگانداردىڭ، قالالىق توتەنشە جاعدايلار دەپارتامەنتىنىڭ جانە ۇلتتىق گۆارديانىڭ بولىمشەلەرى قاتىسقانىن جەتكىزدى. بارلىعى 1600 ادام جۇمىلدىرىلعان. ءبىز بۇگىن سونىمەن قاتار ۇلكەن الماتى كولى مەن ءنومىرى 7№ كولدىڭ جاعدايى بارلانعان. سەل بولاتىنداي ەشقانداي قاۋىپ جوق.
اۆتور: جاپپاربەرگەن ايبوتا
