قىزىلوردا وبلىسىندا جانارماي بەكەتىندە جارىلىس بولدى

استانا. قازاقپارات - قىزىلوردا وبلىسىندا جانارماي بەكەتى وتقا وراندى. جانعان اۋماق «ارالتۇز» كاسىپورنىنا تيەسىلى ەكەن، دەپ حابارلايدى ك ت ك.

كۋاگەرلەردىڭ ايتۋىنشا، كۇندىز بەكەتتە ءبىر قوندىرعى اتىلىپ، سوڭى الاپات ورتكە ۇلاسىپتى. بۋداقتاعان ءتۇتىن بىرنەشە شاقىرىم جەردەن كورىندى. ءۇش جۇمىسشى جالىنعا ورانعان رەزەرۆۋاردان وزدەرى شىعىپ، اۋرۋحاناعا دا ءوز اياقتارىمەن جەتىپتى. قازىر بارلىعى ارال اۋداندىق اۋرۋحاناسىندا جاتىر.

دەنەلەرىنىڭ 90 پايىزدايى كۇيىپ قالعان ازاماتتاردىڭ جاعدايلارى وتە اۋىر. تۋىستارى ولاردى مامانداندىرىلعان مەديتسينالىق مەكەمەگە اۋىستىرۋدى ءوتىنىپ وتىر. ال دارىگەرلەر حال ۇستىندە جاتقان سىرقاتتاردى تاسىمالدايتىن ساناۆياتسيانىڭ ۇشاعىن شاقىرتا الماي الەك.

- 85-95 پايىز كۇيىك اۋداندىق اۋرۋحانادا ەمدەلمەيدى. ولاردىڭ بۇيرەگىنە كومەك كەرەك، گەمودياليز. ول تەك قىزىلوردا وبلىستىق اۋرۋحاناسىندا جاسالادى. ەڭ جوعارى كومەك شىمكەنتتىڭ كۇيىك ورتالىعىندا. بىزگە ەندى قىزىلورداعا جەتىپ الۋ كەرەك، - دەيدى زارداپ شەككەندەردىڭ ءبىرىنىڭ تۋىسى گۇلقياش قۇلمامبەتوۆا.