پەتروپاۆل اۋەجايى تالاپقا ساي بولمايىنشا قىزمەت كورسەتپەيدى

استانا. قازاقپارات - پەتروپاۆل قالاسىنىڭ اۋەجايى سەرتيفيكات تالاپتارىنا سايكەستىگىن تەكسەرۋ بارىسىندا انىقتالعان بۇزۋشىلىقتاردى تولىعىمەن جويمايىنشا رەيستەر قابىلدامايدى جانە جىبەرمەيدى.

بۇل تۋرالى ق ر ينۆەستيتسيالار جانە دامۋ مينيسترلىگىن ازاماتتىق اۆياتسيا كوميتەتى ءتوراعاسىنىڭ ورىنباسارى سەرىك مىقتىبايەۆ ايتتى.

«پەتروپاۆل قالاسىنىڭ حالىقارالىق اۋەجايى» ا ق اۋەجايى سەرتيفيكاتىنىڭ قولدانىلۋ مەرزىمى اياقتالۋىنا بايلانىستى 2015 -جىلعى 18-20 - شىلدەدە ازاماتتىق اۆياتسيا كوميتەتى پەتروپاۆل قالاسىنىڭ اۋەجايىنىڭ سەرتيفيكات تالاپتارىنا سايكەستىگىن تەكسەردى.

 قازاقستان رەسپۋبليكاسى ۇكىمەتىنىڭ 2012 - جىلعى 23 - قاڭتارداعى № 156 - قاۋلىسىمەن بەكىتىلگەن ازاماتتىق اۆياتسيا اۋەجايلارىنىڭ پايدالانۋعا جارامدىلىعى نورمالارىنىڭ تالاپتارىنا سايكەس سەرتيفيكاتتىق تەكسەرۋ ناتيجەسى بويىنشا ءبىرقاتار بۇزۋشىلىق انىقتالدى، ولاردىڭ ىشىندە اۋەجايدى پايدالانۋ كەزىندە قاۋىپسىز ۇشۋعا اسەر ەتەتىن ەكى ەلەۋلى بۇزۋشىلىق بار. ءبىرىنشىسى، ءورت قاۋىپسىزدىگى تالاپتارىنىڭ نورمالارعا سايكەس كەلمەۋى. ەكىنشىسى، جانار- جاعارماي ماتەريالدارىن ساقتاۋ قاعيدالارى نورمالارىنا سايكەس بولماۋى»، - دەپ اتاپ ءوتتى ول.

س. مىقتىبايەۆتىڭ ايتۋىنشا، وسىعان بايلانىستى كوميسسيا پەتروپاۆل قالاسىنىڭ اۋەجايىنا كورسەتىلگەن بۇزۋشىلىقتار جويىلعانعا دەيىن جارامدىلىق سەرتيفيكاتىن بەرۋدەن باس تارتۋ تۋرالى شەشىم قابىلدادى.

ايتا كەتەيىك، اتالمىش اۋەجاي سەرتيفيكاتى جارامدى كەزدە اپتاسىنا 4 رەت استانا- پەتروپاۆل- استانا جانە اپتاسىنا 2 رەت الماتى- پەتروپاۆل- الماتى باعىتتارى بويىنشا رەيستەر قابىلداعان. وسى رەيستەردى «سكات» اۋەكومپانياسى ا ن-24 اۋە كەمەسىمەن جۇزەگە اسىرىپ كەلگەن.

«ازىرگە ەشقانداي ۇشاقتار ۇشىرىلىپ جاتقان جوق. قازىرگى ۋاقىتتا «سكات» اۋەكومپانياسى جولاۋشىلارعا ۇشۋدىڭ باسقا جولدارىن نەمەسە ساتىپ الىنىپ قويعان بيلەتتەردىڭ اقشاسىن قايتارۋ شارالارىن قاراستىرۋدا»، - دەيدى س. مىقتىبايەۆ.

ونىڭ ايتۋىنشا، بىلتىرعى تەكسەرىس كەزىندە دە تالاپقا ساي ەمەس تۇستار تابىلعان، الايدا ولار دەر كەزىندە تۇزەتىلىپتى. تاعى ءبىر ايتا كەتەرلىگى، بيىل اتالعان اۋەجايعا جوندەۋ جۇمىستارىن جۇرگىزۋ جوسپارلانعان. مەملەكەتتىك باعدارلاما بويىنشا 6 ميلليارد تەڭگە ءبولىنىپ وتىر.

 «اۋەجايدىڭ ۇشۋ الاڭى مەن پەررونىن تۇبەگەيلى جوندەۋ جۇمىستارى جوسپارلانىپ وتىر. بۇل رەيستەردى ەداۋىر قاۋىپسىز ەتەدى. بيىل جوندەۋ جۇمىستارى باستالادى»، - دەدى ءتوراعا ورىنباسارى.

 اۆتور: ءابۋ- اسقار مەكەش ۇلى