جوعارعى سوت ءتوراعاسى قالتا تەلەفونىن شۇقىلاۋمەن وتىراتىن سۋديالاردى سىنعا الدى
«جەكەلەگەن سۋديالار سوت پروتسەسىن وتكىزۋگە جەتكىلىكتى تۇردە كوڭىل بولمەيدى. سوت وتىرىستارىن كەشىكتىرىپ باستايدى، ءىس ماتەريالدارىمەن جاقسى تانىس بولمايتىندارى دا بار. ال كەيبىر سۋديالار سوت وتىرىسى بارىسىندا وزدەرىن دورەكى، ادەپسىز ۇستايدى، كەيبىرى پروتسەسكە قاتىسۋشىلاردىڭ بەيادەپ ارەكەتتەرىنە دە ءمان بەرمەيدى. ماسەلەن، اۋديو- بەينە جازبالاردى قاراۋ بارىسىندا قىزىلوردا وبلىستىق سوتىنىڭ سۋدياسى سوت وتىرىسىنىڭ بارىسىندا مەملەكەتتىك ايىپتاۋشى ەكەۋى باستان- اياق ۇيالى تەلەفونىن شۇقىلاپ، قاراۋمەن وتىردى. سوسىن بەينەجازبانى تالداۋ بارىسىندا سۋديانىڭ ءبىر جاس ازاماتتى وزىنە بىرنەشە مارتە شاقىرىپ الىپ، ونىمەن ۇزاق ۋاقىت بويى اڭگىمەلەسكەنى كورىنىپ تۇر»، - دەيدى قايرات ءمامي.
جوعارعى سوت ءتوراعاسىنىڭ ايتۋىنشا، مۇنداي فاكتىلەر از ەمەس. بۇل رەتتە ءتوراعا، جوعارعى سوتقا جاقىندا وسىنداي ماسەلەگە قاتىستى تاعى ءبىر ارىز- شاعىم تۇسكەنىن العا تارتتى. «بۇل شاعىمدا دا قىلمىستىق ءىس بويىنشا ءوتىپ جاتقان سوت پروتسەسى بارىسىندا پروكۋرور بۇكىل سوت وتىرىسى بارىسىندا ءوزىنىڭ ۇيالى تەلەفونىنان باس الماعان. ال سوتقا جەتەكشىلىك ەتكەن الماتى قالالىق سوتىنىڭ سۋدياسى بۇعان ەشقانداي ەسكەرتۋ جاساماعان. وسى شاعىم بويىنشا بەينەجازبانى قاراۋ بارىسىندا ونداي فاكتىلەر راستالدى. سۋديالاردىڭ بۇنداي ارەكەتتەرى بۇكىل سوت جۇيەسىنىڭ يميدجىنە كەرى اسەرىن تيگىزەدى. وسىعان بايلانىستى، وبلىستىق سوت باسشىلارىنا مەزگىل سايىن بارلىق سوت وتىرىستارىنىڭ اۋديو- بەينە حاتتامالارىن قاراپ وتىرۋدى تاپسىرامىن»، - دەدى ق. ءمامي.
بۇل رەتتە ءتوراعا سوت وتىرىستارى بويىنشا جوعارىدا كورسەتىلگەندەي بۇزۋشىلىقتاردىڭ قايتالاپ ورىن الۋى جاعدايىندا ونداي ماتەريالداردى سۋديا ەتيكاسى جونىندەگى كوميستسياعا جىبەرۋدىڭ قاجەتتىلىگىن اتاپ ءوتتى.
اۆتور: قانات مامەتقازى ۇلى
