ەلباسى تۇركيا پرەزيدەنتىنە سۋرۋچ قالاسىندا بولعان تەررورلىق اكتىگە بايلانىستى كوڭىل ايتتى

استانا. قازاقپارات - قازاقستان پرەزيدەنتى نۇرسۇلتان نازاربايەۆ تۇرىك رەسپۋبليكاسىنىڭ پرەزيدەنتى رەدجەپ ەردوعانعا سۋرۋچ قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى.

بۇل تۋرالى اقوردانىڭ باسپا ءسوز قىزمەتى حابارلادى.

جەدەلحاتتا مەملەكەت باسشىسىنىڭ قايعىلى وقيعا سالدارىنان ونداعان جازىقسىز جاننىڭ قازا تاپقانى جانە جۇزدەن استام ادامنىڭ جاراقاتتانعانى تۋرالى حاباردى زور كۇيزەلىسپەن قابىلداعانى اتاپ وتىلگەن.

قازاقستان پرەزيدەنتى تەرروريزمنىڭ بۇگىنگى تاڭدا ادامزاتقا ورتاق قاۋىپ-قاتەرگە اينالىپ وتىرعانىنا دا توقتالعان. نۇرسۇلتان نازاربايەۆ تەررورلىق ارەكەتتىڭ ۇيىمداستىرۋشىلارى مەن ورىنداۋشىلارى انىقتالىپ، قاتاڭ جازاعا تارتىلاتىنىنا سەنىمدى ەكەنىن جەتكىزگەن.

جەدەلحات سوڭىندا مەملەكەت باسشىسى بۇكىل قازاقستاندىقتاردىڭ جانە جەكە ءوزىنىڭ اتىنان قازا بولعانداردىڭ تۋعان-تۋىستارى مەن جاقىندارىنا، سونداي-اق بارشا تۇركيا حالقىنا كوڭىل ايتىپ، جارالانعانداردىڭ تەز ساۋىعىپ كەتۋىنە تىلەكتەستىك بىلدىرگەن.