قايرات نۇرتاستىڭ كيىمى جارتى ميلليون تەڭگەگە ساتىلىپ جاتىر

استانا. قازاقپارات - ينتەرنەت جەلىسىندە تانىمال ءانشى قايرات نۇرتاستىڭ كوستيۋمى ساتىلاتىندىعى تۋرالى جارناما جاريالاندى.

ايدوس ساندىبايەۆ ەسىمدى ازامات ءانشىنىڭ كيىمى ءۇشىن 500 مىڭ تەڭگە سۇراپ وتىر دەپ جازادى Tengrinews.kz.

جارناما اۆتورىنىڭ ايتۋىنشا، قىمبات تۇيمەلەرمەن بەزەندىرىلگەن اق ءتۇستى كوستيۋمدى ول سەمەيدە وتكەن كونسەرت بارىسىندا قاعىپ العان. «بۇل 28- ماۋسىم كۇنى بولاتىن. مەن ءوز وتباسىممەن «سپارتاك» ستاديونىنداعى كونسەرتكە باردىم. قايرات نۇرتاس ءان ايتىپ جاتىپ ۇستىندەگى كوستيۋمىن شەشتى دە، كورەرمەندەرگە قاراي لاقتىردى. مەنىڭ جولىم بولىپ، قاعىپ الدىم» دەيدى ساندىبايەۆ.

ونىڭ ايتۋىنشا، جارناماعا قىزىعۋشىلىق تانىتقاندار كوپ، ءبىراق كوپشىلىگى باعاسىن ارزانداتۋدى سۇراپ وتىرعان كورىنەدى. «بۇل قۇندى كيىم. مەن جالدامالى پاتەردە تۇرعاندىقتان، ماعان قازىر قاراجات اۋاداي قاجەت. ساتىپ العىسى كەلگەندەر ونى 300 مىڭ تەڭگەگە سۇراپ جاتىر. ءبىراق مەن كەلىسپەيمىن. ءتىپتى، Audi كولىگىن ۇسىنعاندار دا بار» دەپ اتاپ ءوتتى ساتۋشى جىگىت.