الماتى بازارلارىندا ادام اعزاسىنا قاۋىپتى قاۋىن- قاربىزدار ساتىلىپ جاتىر

 استانا. قازاقپارات - الماتى بازارلارىنداعى ونىمدەر ارنايى قۇرالدارمەن تەكسەرىلدى. زەرتتەۋ ناتيجەسى قاۋىن قاربىزدىڭ بارلىعىندا نيترات مولشەرى جوعارى دەڭگەيدە ەكەنىن كورسەتتى،

 دەپ حابارلادى «الماتى» تەلەارناسى.

 سىرتتان ەرتە جەتكىزىلەتىن ونىمدەر ارنايى حيميالىق تىڭايتقىشتاردىڭ كۇشىمەن پىسكەن. سوندىقتان اعزاعا قاۋىپتى.

 «ءبىزدىڭ تۇتىنۋشىلارعا ايتاتىنىمىز وزدەرىنە ۇناماعان، نە بولماسا، جارامسىزدىعىن تەكسەرگىسى كەلسە، ءونىمىن بىزگە الىپ كەلىپ، تەكسەرتىپ، ناتيجەسىن الۋ مۇمكىندىگى بار »، - دەدى الماتى ق. تۇتىنۋشىلار قۇقىعىن قورعاۋ دەپارتامەنتى ءبولىمىنىڭ باس مامانى انەل مۇساەۆا.

تۇتىنۋشىلاردىڭ قۇقىعىن قورعاۋ دەپارتامەنتىنىڭ ماماندارى بازارلارداعى كوكونىستەردى 3 كۇن ارالىعىندا ساراپتان وتكىزگەن. وسى ۋاقىت ارالىعىندا 13 بازار مەن 6 جارمەڭكە تەكسەرىلىپتى. 640 كوكونىس جانە جەمىس- جيدەكتەن سىناما الىنعان. وسىنداي جولمەن ماماندار الماتىلىقتاردى ساپاسىز ونىمدەردەن قورعاماق.

«تاعام ۋلانۋىنان الدىن- الۋ نيترات مولشەرىنىڭ دەڭگەيىن انىقتاۋ. ياعني، ونىڭ مولشەرى جوعارىلايتىن بولسا، وندا تاعام ۋلانۋى بايقالادى. جالپى اۋدان بويىنشا ونداي دەرەكتەر تىركەلگەن جوق» ، - دەدى الماتى قالاسى المالى اۋدانى تۇتىنۋشىلار قۇقىعىن قورعاۋ دەپارتامەنتىنىڭ باس مامانى اسەم كەزەمباەۆا.

ماماندار جەدەل تەكسەرۋ شاراسىن تۇرعىنداردىڭ ءوتىنىشى بويىنشا تامىزعا دەيىن جالعاستىرماق. مۇنداي ساراپتامالىق جۇمىس بازارلار اۋماعىندا جۇرگىزىلەدى. كەيىننەن، قاۋىپتى ءونىم انىقتالعان ساۋدا ورنى جەتەكشىلىگىنە بۇل جايىندا حابارلانىپ، شارا قولدانىلادى. ال كاسىپكەرلەر بولسا، ءوز كەزەگىندە وسىنداي شارۋالارمەن كەلىسىمىن بۇزاتىن كورىنەدى.