قازاقستاندا جاڭا وقۋ باعدارلاماسى بويىنشا اسكەري ۇشقىشتاردى ىرىكتەۋ باستالدى - فوتو

استانا. قازاقپارات - كەڭەس وداعىنىڭ ەكى مارتە باتىرى ت. بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىنا وقۋعا تۇسەتىن جاستار بيىلعى جىلى جاڭا باعدارلاما بويىنشا وقىتىلاتىن بولادى.

ءبىرىنشى كۋرس - جالپى اسكەري فاكۋلتەتتە وقۋ، ەكىنشى كۋرس - ۇلگەرىمى، دەنساۋلىق جاعدايى جانە مەديتسينالىق كورسەتىلىمدەر ەسكەرىلە وتىرىپ، ماماندىقتار بويىنشا ءبولۋ. مۇنداي جۇيە اسكەري جوعارى وقۋ ورنىندا العاش رەت ەنگىزىلىپ وتىر.

وسىنداي ادىستەمە بولاشاق مامانداردى دايارلاۋدىڭ ساپاسىن ارتتىرۋعا مۇمكىندىك بەرەدى جانە ماماندىقتار تۋرالى ناقتى تۇسىنىك الىپ، ءبىر جىل وقىعاننان كەيىن دۇرىس تاڭداۋ جاساۋ ءۇشىن جاستاردىڭ وزدەرىنە پايدالى بولادى دەپ كۇتىلۋدە.

قازىرگى ۋاقىتتا ۇشۋ ينستيتۋتى وقۋعا تۇسۋگە جاڭا جيناقتاۋدى باستادى. كونكۋرستىق ىرىكتەۋدى (پسيحولوگيالىق تەست، دەنە دايارلىعى نورماتيۆتەرى، مەديتسينالىق تەكسەرۋ) جاسوسپىرىمدەر جوعارى وقۋ ورنىندا وتەدى. قازىردىڭ وزىندە مۇندا اقتوبە مەن اقتوبە وبلىسىنان جينالعان العاشقى 50 تالاپكەر كەلىپ جەتتى، ال 26 - شىلدەگە دەيىن قازاقستاننىڭ وزگە وڭىرلەرىنەن شامامەن 130 جاسوسپىرىم كەلەدى دەپ كۇتىلۋدە. مۇندا تالاپكەرلەردىڭ سانى جاعىنان اسكەريلەرگە، اتاپ ايتقاندا، ۇشۋ ماماندىقتارىنا سۇرانىس ارتىپ كەلەدى دەۋگە بولادى. كوپتەگەن جاس بوزبالالار وزدەرىنىڭ كەلەشەگىن ۇشقىش نەمەسە ينجەنەر كاسىبىمەن بايلانىستىرىپ، ەلىمىزدىڭ قارۋلى كۇشتەرىندە قىزمەت ەتكىسى كەلەدى.

كەڭەس وداعىنىڭ ەكى مارتە باتىرى ت. بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى بىلىكتى ۇشقىشتاردى، ينجەنەر- مەحانيكتەردى، شتۋرمانداردى، راديوينجەنەرلەردى دايىنداۋدى جۇزەگە اسىراتىن ورتا- ازيالىق وڭىردەگى بىردەن- ءبىر جوعارى وقۋ ورنى بولىپ تابىلاتىنىن ايتا كەتەيىك. بۇل ءبىلىم وشاعىندا توعىز ماماندىقتا 500-گە جۋىق كۋرسانت، ونىڭ 50 ۇجىمدىق قاۋىپسىزدىك تۋرالى شارت ۇيىمى شەڭبەرىندە ءبىلىم نارىمەن سۋسىنداۋدا، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.