قىزىلوردادا ەكى مىڭنان استام كارىز قۇدىعىنىڭ قاقپاقتارى قولدى بولعان

قىزىلوردا. قازاقپارات - قالا تۇرعىندارى سوڭعى ءۇش جىلدا ەكى مىڭنان استام سەرۆيستىك جانە كارىز قۇدىقتارىنىڭ قاقپاعىن ۇرلاپ كەتكەنى ءۇشىن «جازالاندى»، دەپ حابارلادى قىزىلوردا قالالىق اكىمدىگىنىڭ باسپا ءسوز قىزمەتى.

«بۇل وتە وزەكتى ماسەلە، سەبەبى سۋمەن قامتۋ ۇيىمى قۇدىق قاقپاقتارىن ءوز قاراجاتىنا ساتىپ الادى. 2013 -جىلى قالالىق سۋ ارناسى 1200 قاقپاق ساتىپ الدى، وتكەن جىلى - 600، بيىل تاعى دا قاراجات ءبولىنىپ وتىر. جالپى العاندا ءۇش جىل ىشىندە 19 ميلليون تەڭگەگە جاقىندايدى»، - دەيدى  قىزىلوردا اكىمى نۇرلىبەك نالىبايەۆ.

قالادا كۇندىز دە، تۇندە دە قوسىلىپ تۇراتىن بەينەباقىلاۋ كامەرالارىنىڭ ارقاسىندا قاقپاقتاردى جىمقىرىپ كەتكەن ۇرىلاردى تابۋ اسا قاتتى قيىنعا سوقپايدى. ال ۇستالعان ازاماتتار تەمىر قاقپاقتى نە ءۇشىن قولدى ەتكەندەرىن دە جاسىرماي ءتۇسىندىرىپ جاتاتىن كورىنەدى.

 «بۇل جەردە ۇرىلاردىڭ قاقپاقتى ماقساتتى تۇردە قولدى ەتكەندەرى انىق. ال كوممۋنالدىق مەنشىكتى بۇزاقىلىق پيعىلمەن بۇزاتىنداردى ءتۇسىنۋ قيىن. مىسالى، قالالىق وقۋشىلار سارايىنىڭ ماڭىنداعى ساياباقتا بىرەۋلەر كوشە شامدارىن سىندىرىپ، ءمۇسىن فورمالارىن قيراتىپ كەتكەن. مەتسەناتتار شۇعىلا شاعىناۋدانىندا تۇرعىندارعا جايلى تىنىمباق اشقان ەدى. كوپ ۇزاماي بۇزاقىلار وندا دا ويران سالىپ كەتتى. مۇنداي جاعدايلار قالا اكىمشىلىگىنىڭ باستى نازارىندا، سەبەبى حالىقتىڭ مادەني دەمالىسى ءۇشىن قاجەتتى ينفراقۇرىلىم قۇرۋعا مەملەكەت قازىناسىنان از اقشا بولىنبەيدى»، - دەپ تولىقتىردى ن. نالىبايەۆ.