كوپ بالالى قادىروۆتار جانۇياسى وتباسى باقىتىنىڭ قۇپياسىمەن ءبولىستى
ايتا كەتەيىك، قادىروۆتار اۋلەتى الماتى وڭىرلىك «مەرەيلى وتباسى» بايقاۋىندا جەڭىمپاز اتاندى. ولاردان بولەك ۇلتتىق بايقاۋدا وڭتۇستىك استانانىڭ نامىسىن ينتەرناتسيونالدى دۋدايەۆتار وتباسى قورعايتىن بولدى.
بۇگىن قادىروۆتار وتباسىنىڭ وتاناسى كۇنسۇلۋ قادىروۆا كۇندەلىكتى كۇيبەڭ تىرلىگىنەن ءبىر ءسات قول ءۇزىپ، بىزبەن تىلدەسۋگە كەلىستى.
- «مەرەيلى وتباسى» بايقاۋىنا قاتىسۋعا نە تۇرتكى بولدى؟
- ءبىز بۇل بايقاۋ تۋرالى ۇنەمى ەستيتىنبىز. ءبىراق قاتىسىپ كورمەپپىز. ۇسىنىس مەنىڭ كۇيەۋىم قادىروۆ مۇراتباي جۇمىس ىستەيتىن №148 مەكتەپ گيمنازياسىنىڭ ديرەكتورىنان ءتۇستى. ول كىسى ءبىزدىڭ وتباسىمىزدى جەتىسۋ اۋدانىنىڭ اتىنان قاتىسۋعا شاقىردى. قاجەتتى قۇجاتتاردى جينادىق. كەيىن «سىزدەر قالالىق كونكۋرستا 2 -ورىن الدىڭىزدار» دەپ جەتىسۋ اۋداندىق اكىمدىگىنەن حابارلاستى. سول كەزدە ءبىر قۋانىشقا كەنەلگەنىمىزدى سەزدىك. مەن ايتار ەدىم، بۇل بايقاۋ ەڭ ادىلەتتى بايقاۋ دەپ. ويتكەنى، وندا ۇنەمى بەلگىلى عالىمداردىڭ، بەلگىلى ازاماتتاردىڭ وتباسىلارى باق سىنايدى. ءبىز قاراپايىم وتباسى بولعاندىقتان مەنىڭ جەڭىسكە اسا سەنىمىم بولعان جوق.
- كوميسسيانىڭ سىزدەردى جەڭىمپاز دەپ تانۋىنا نە سەبەپ بولدى؟
- ءبىزدىڭ وتباسىمىزدا 9 ادام. وتاعاسى ەكەۋىمىز 7 بالا تاربيەلەپ كەلە جاتىرمىز. وسى بالالارىمنىڭ نەسىبەسى بولار.
- الماتىدا بۇرىننان تۇراسىزدار ما؟
- الماتىعا وڭتۇستىك قازاقستان وبلىسىنان 1999 -جىلى كوشىپ كەلدىك. جولداسىم قاراپايىم جۇمىسشى. №148 مەكتەپتە سانتەحنيك بولىپ قىزمەت ەتەدى. ال، مەن 10 جىل بولدى بالا تاربيەسىمەن ۇيدەمىن.
- شاڭىراق قوسقاندارىڭىزعا قانشا ۋاقىت بولدى؟
- 25 جىل بولادى بيىل. كۇمىس تويىمىزدى تويلايمىز.
- بالالارىڭىز جايلى ايتىپ وتسەڭىز.
- تۇڭعىشىمىز ينديرا الياكباروۆا 1992 -جىلى تۋعان. قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. «الماتى» تەلەارناسىندا جۋرناليست. 1995 -جىلى ايتولقىن ەسىمدى قىزىم دۇنيەگە كەلدى. ول جاڭا ەكونوميكالىق ۋنيەۆرسيتەتتىڭ «كەدەن ءىسى» فاكۋلتەتىندە وقيدى. ستۋدەنت. ءۇشىنشى ۇلىم باعدات مەكتەپ ءبىتىردى. ءتورتىنشى ۇلىم ماقسات 8 -سىنىپتى ءتامامدادى. 2006 -جىلى وتباسىندا كۇتپەگەن جەردەن ۇشەم دۇنيەگە كەلدى. سارا، يمانعالي، مۇقاعالي ەسىمدى سابيلەرىمنىڭ كەلۋى وتباسىمىزعا قۇت- بەرەكەسىن الا كەلدى. قازىر ولار 9 عا تولدى. 2006 -جىلى 18 -ساۋىردە بوساندىم.
ءبىر ايدان سوڭ قالا اكىمى يمانعالي تاسماعامبەتوۆ «قۇلاگەر» شاعىن اۋدانىنان 3 بولمەلى پاتەر بەردى. كەيىننەن 7 بالالى وتباسىعا ول ازدىق ەتەدى دەپ، قاسىنداعى 1 بولمەلى پاتەردى تاعى قوسىپ بەردى. قازىر بالالارىمنىڭ بارلىعى شىعارماشىلىقتان قۇر الاقان ەمەس. ۇشەمىم 2010 -جىلى اننەن «ءمولدىر بۇلاق» بايقاۋىندا، حالىقارالىق «عۇمىر داريا» بايقاۋىندا باس جۇلدەنى جەڭىپ الدى. ەكى ۇلىم باعدات پەن ماقسات تا كۇلاش بايسەيىتوۆا اتىنداعى دارىندى بالالارعا ارنالعان مۋزىكالىق مەكتەپتە بارابان جانە فلەيتە كلاسىن ءبىتىرىپ شىقتى. ماقساتىم سپورتقا جاقىن. ۇيدە ونىڭ اكەلگەن گراموتالارىنىڭ سانى 70-80 نەن اسىپ جىعىلدى. قازىر بالالارىم ءان، ءبي ۇيىرمەلەرىنە قاتىسادى.
- الماتىنىڭ قانداي كورنەكتى جەرلەرىندە وتباسىلىق دەمالىس وتكىزگەندى قالايسىزدار؟
- ءبىز ۇنەمى مادەني ورىندارعا تەاترلارعا، كونسەرتتەرگە، سيرككە ءجيى بارامىز. بالالار قىدىرعاندى جاقسى كورەدى. اسىرەسە، زووباققا بارعىلارى كەلەدى.
- ايرانداي ۇيىپ وتىرعان وتباسىلىق باقىتىڭىزدىڭ كىلتى نەدە دەپ ويلايسىز؟ كەيىنگى بۋىنعا قانداي اقىل- كەڭەسىڭىز بار؟
- وتباسى قۇندىلىقتارى يسلام دىنىندە كورسەتىلگەن. ولارايەلدىڭ ەرگە مويىنسۇنۋى، ءوزارا تاتۋلىق، ءبىرى-بىرىنە دەگەن قايىرىمدىلىق. مەن قۇدايعا مىڭ شۇكىرلىك ەتەمىن. ەرىمنىڭ مىنەزى اۋىرلاۋ، ارتىق سويلەمەيدى. مەن ۇنەمى قانداي ماسەلەدە بولسىن وعان ارقا سۇيەيمىن. سىڭلىلەرىمە ايتارىم، ايەلدىڭ ەرىنە مويىنسۇنۋى كوپ جاقسىلىقتارعا اكەلىپ، كوپ كەسىرلى جاعدايلاردان ساقتايدى.
- سۇحباتىڭىزعا راحمەت. وتباسىڭىزعا جەڭىس تىلەيمىن!
- راحمەت.
اۆتور: گۇلميرا عوسمانالي
