باۋىرجان مومىش ۇلىنىڭ ناقىل سوزدەرى

استانا. قازاقپارات - بۇگىن ءبىز سىزدەردىڭ نازارلارىڭىزعا ءباھادۇر بابامىزدىڭ ناقىل سوزدەرىن ۇسىنۋدى ءجون كورىپ وتىرمىز.

1. قارابەت بولىپ قاشقانشا - قايرات كورسەتىپ ولگەن ارتىق.

2. ادىلدىكتى مويىنداۋ - ادال كىسىنىڭ ءىسى.

3. ءوز ۇلتىن سىيلاماۋ، ونى ماقتانىش ەتپەۋ - ساتقىندىق.

4. نامىستى نانعا ساتپا.

5. ءتىل تازالىعى ءۇشىن كۇرەس - ەشقاشان تولاستامايتىن ماڭگىلىك كۇرەس.

6. ءسوز جىلاتا دا، جۇباتا دا الادى.

7. انامىزدىڭ اق سۇتىمەن بويىمىزعا دارىعان انا ءتىلىمىزدى ۇمىتۋ - بۇكىل اتا بابامىزدى، بار تاريحىمىزدى ۇمىتۋ.

8. ءتىل - ۇلت قاسيەتىن ايقىندايتىن بەلگى، ۇلتتىق سالت-سانا وزەگى.

9. قازاق ءتىلى - سۇلۋلىعىمەن بوي بالقىتىپ، تامىر شىمىرلاتاتىن، جان جۇيەڭدى جاندىرىپ، قۇلاق قۇرىشىن قاندىراتىن، وتكىرلىگىمەن قىسىلتاياڭ تۇستا ەر مەن ەلگە بىردەي مەدەت بەرەر عاجايىپ كەمەل ءتىل.

10. جاقسى ءسوز جانعا - جاقىن، قۇلاققا - جاعىمدى، ويعا - قونىمدى كەلەدى.

11. اتا-انا قادىرىن بىلمەگەن ەل - قادىرىن بىلە الماس،

ەل قادىرىن بىلمەگەن - اتا-انا قادىرىن بىلە الماس.

12. باتىرلىق تاۋەكەل مەن اقىلدىڭ ەسەبىنەن شىعۋعا ءتيىس. تاۋەكەل كەيدە اقىلدى دا اقتاپ الادى. ال اقىلسىز تاۋەكەلدى ەشتەڭە دە اقتاپ الا المايدى.

13. ەرلىك - ەلدىڭ قاسيەتى، جۇرەكتىلىك - جىگىتتىڭ قاسيەتى.

14. وتىرىكتىڭ بالىن جالاپ ءتىرى جۇرگەنشە - شىندىقتىڭ ۋىن ءىشىپ ولگەن ارتىق.

15. يمەنىپ ءجۇرىپ كورگەن يگىلىكتەن - قارسىلاسىپ ءجۇرىپ كورگەن بەينەت ارتىق.