08:10, 20 - شىلدە 2015 | GMT +5
ساۋد ارابياسى كورولىنىڭ فرانسياداعى دەمالىسى داۋعا اينالدى
استانا. قازاقپارات - ساۋد ارابياسىنىڭ كورولى سالمان يبن ابدۋلازيز ءال-ساۋدتىڭ دەمالۋى ءۇشىن فرانسياداعى كوگىلدىر جاعالاۋدىڭ (لازۋرنىي بەرەگ) ءبىر بولىگىن جەرگىلىكتى بيلىكتىڭ ۋاقىتشا جاۋىپ تاستاۋى ۇلكەن داۋعا اينالدى، دەپ جازادى شەتەلدىك ب ا ق.
ۆاللوريس قالاسىنىڭ اكىمشىلىگى 400 ادامنان تۇراتىن ساۋد كورولى جاقىندارىنىڭ قاۋىپسىزدىگى ءۇشىن جاعالاۋدىڭ جارتىسى قورشالعانىن راستادى. ياعني، كورولدىڭ دەمالىسى كەزىندە قورشالعان بولىك وزگە ادامدار ءۇشىن جابىق بولادى.
بۇل شەشىم جەرگىلىكتى جانە وسى جاعالاۋدا ءجيى دەمالاتىن ادامداردىڭ قارسىلىعىن تۋعىزدى.
سونىمەن قاتار، كورول دەمالاتىن ۆيللادان جاعالاۋعا دەيىنگى ليفت قۇرىلىسى دا ەلدىڭ نارازىلىعىن تۋعىزدى. ساۋد ارابياسىنىڭ وكىلدەرى دەمالىس بىتە سالىسىمەن قورشاۋ الىنىپ تاستايتىنىن ايتىپ، ۋادە بەردى.
