وزبەكستاندا گۋلنارا كاريموۆانى قۋدالاعاندار ۇيلەرى ءسۇرىلىپ جاتىر

استانا. قازاقپارات - وزبەكستاندا الدەكىمنىڭ پارمەنىمەن بۇعان دەيىن پرەزيدەنتتىڭ ۇلكەن قىزى گۋلنارا كاريموۆانى قۋدالاۋدى ۇيىمداستىرىپ كەلگەن ۇلتتىق قاۋىپسىزدىك قىزمەتىنىڭ باسشىلارى مەن وعان «قول كوتەرگەن» شەنەۋنىكتەردىڭ ءبارىنىڭ جىلجىمايتىن مۇلىكتەرىن بۇزىپ، جەرمەن- جەكسەن ەتۋ جۇمىستارى ءجۇرىپ جاتىر.

بۇل تۋرالى CA- News حابارلادى.

«تاشكەنت وبلىسىندا وزبەكستان ۇلتتىق قاۋىپسىزدىك قىزمەتى رايىسىنىڭ بۇرىنعى ورىنباسارى، گەنەرال حاەت شاريفحودجايەۆقا قاراستى جىلجىمايتىن مۇلىكتەر نىساندارىن ءسۇرىپ تاستاۋ جۇمىستارى قولعا الىندى»، - دەلىنگەن حابارلامادا.

شىلدەنىڭ 16- كۇنى وزبەكستان بيلىگىنە جاقىن، ءبىر-بىرلەرىنەن تاۋەلسىز ەكى مانبە بۇدان ءبىر كۇن بۇرىن تاشكەنت وبلىسىندا ۇلتتىق قاۋىپسىزدىك قىزمەتى جەكە قاۋىپسىزدىك باسقارماسىنىڭ 52 جاستاعى بۇرىنعى باستىعى، گەنەرال حاەت شاريفحودجايەۆ پەن ونىڭ تۋىستارىنىڭ جىلجىمايتىن مۇلىك نىساندارىن ءسۇرۋ جۇمىستارى باستالعانىن جەتكىزدى. مانبەلەردىڭ ءبىرىنىڭ بايانداۋىنا قاراعاندا، بۇل جىلجىمايتىن مۇلىك نىساندارى، ناقتىراق ايتقاندا، رەستوراندار، مەيمانحانالار مەن ساياجايلار وزبەكستان ۇلتتىق قاۋىپسىزدىك قىزمەتى ءتوراعاسىنىڭ بۇرىنعى ورىنباسارى حاەت شاريفحودجايەۆ پەن ونىڭ سوتتالىپ كەتكەن ءىنىسى دجاۆدات شاريفحودجايەۆتىڭ، سونداي- اق وزبەك قاۋىپسىزدىك قىزمەتىنىڭ باسقا دا قىزمەتكەرلەرىنىڭ مەنشىكتەرىنە جاتادى.

«قازىر بيلىك تاشكەنت وبلىسىنىڭ بوستاندىق اۋدانىنداعى چارۆاك سۋ قويماسىنا جاقىن جەردە ورنالاسقان جىلجىمايتىن مۇلىك نىساندارىنىڭ بىرىنەن كەيىن ءبىرىن تارتىپ الىپ، قيراتىپ تاستاۋعا كىرىستى. شىن مانىندە بۇل نىساندار مۇلدەم باسقا كىسىلەردىڭ اتتارىنا تولتىرىلعان. سوندىقتان جىلجىمايتىن مۇلىكتەردى زاڭدى جولمەن تاركىلەپ الۋعا مۇمكىندىكتىڭ جوقتىعىنا بايلانىستى بيلىك ولاردى «رۇقساتسىز سالىنعان»، «مەملەكەتتىك كاداستردا جوق»، «قاۋىپسىزدىك پەن ەكولوگيا تالاپتارىنا جاۋاپ بەرمەيدى» دەگەن جەلەۋلەرمەن تارتىپ الىپ جاتىر نەمەسە قيراتۋعا ۇشىراتۋدا، دەگەندى ايتادى مانبەنىڭ ءبىرى.

كەلەسى اڭگىمەشى وزبەكستان كۇشتىك قۇرىلىمدارىندا چارۆاك سۋ قويماسى جانىنداعى يۋريي ساۆينكوۆتىڭ، يگور ساۆينكوۆتىڭ، راۆشان دجۋرايەۆ پەن ميرالام ميرزايەۆتىڭ، ياعني بۇرىن وزبەك قاۋىپسىزدىك قىزمەتىنىڭ جوعارى لاۋازىمدى شەنەۋنىكتەرىنە جاقىن تۇلعالاردىڭ «كەڭ سااريداي بوز ۇيلەرى» قيراتىلاتىنىن ايتىپ وتىر.

ونىڭ سوزىنە قاراعاندا، چارۆاك سۋ قويماسى جانىنداعى حاەت شاريفحودجايەۆتىڭ مەنشىگىنە جاتاتىن «كولوكولچيك» جانە «بوچكا» رەستوراندارى باسقا ادامداردىڭ اتتارىنا جازىلىپ قويىلعان.

«بيلىك ديزاينى قورشاعان ورتاعا تولىق جاۋاپ بەرەتىندەرىنە، جاقسى تابىس كەلتىرىپ تۇرعاندارىنا قاراماستان، ەشقانداي ءبىر سەنىمدى سەبەپسىز قيراتىلعالى جاتىر. ولاردىڭ قۇرىلىستارىنا از اقشا جۇمسالعان جوق. قازىر ءبىز «يليم» - نىڭ تاريحي نىسانداردى قيراتىپ جاتقانىنا بايلانىستى ءبىراز شۋ كوتەرەمىز. ال مۇندا بۋلدوزەرلەر كوپتەگەن جۇرتقا تيگىزەتىن پايدالارى كوپ عيماراتتاردى ءبىر كۇننىڭ ىشىندە ءسۇرىپ تاستاۋدا. ولار تەك كەك قايتارۋ ءۇشىن عانا وسىنداي تىرلىككە بارا الادى»، - دەدى مانبە.

رەداكسيا ۇلتتىق قاۋىپسىزدىك قىزمەتى وكىلدەرىنەن تاشكەنت وبلىسىندا عيماراتتاردىڭ قيراتىلىپ جاتقانىنا قاتىستى تۇسىندىرمە الا الماعان.

ەسكە سالا كەتەيىك، وزبەكستان پرەزيدەنتىنىڭ ۇلكەن قىزى گۋلنارا كاريموۆا 2013 -جىلدىڭ سوڭىندا بريتانيانىڭ The Telegraph گازەتىنە بەرگەن سۇحباتىندا ۇلتتىق قاۋىپسىزدىك قىزمەتىندە ىستەيتىن اعايىندى حاەت جانە دجاۆدات شاريفحودجايەۆتاردىڭ «رەيدەرلىك جولمەن» چارۆاك سۋ قويماسىنداعى تالاي ادامنىڭ بيزنەستەرىن تارتىپ العاندارىن مالىمدەگەن ەدى. كاريموۆانىڭ وسى مالىمدەمەسىنەن كەيىن ەكى جىل وتكەندە، ۇلتتىق قاۋىپسىزدىك قىزمەتى ۇيىمداسقان قىلمىسقا جانە جەمقورلىققا قارسى كۇرەس باسقارماسىنىڭ باستىعى دجاۆدات شاريفحودجايەۆ ءتورت جىلعا سوتتالدى، ال ونىڭ ادىلەت مينيسترلىگى سوت دەپارتامەنتىنىڭ تاشكەنت اۋماقتىق باسقارماسىنىڭ باستىعى ورىنتاعىندا وتىرعان تۋعان جيەنى دجاحونگير گۋلوموۆ قاماۋعا الىندى.

«ازاتتىق» («وزودليق») راديوستانساسىنىڭ وزبەك بولىمشەسى بۇعان دەيىن دجاۆدات شاريفحودجايەۆتىڭ قاراۋىنداعى تاعى جيىرما قىزمەتكەردىڭ تۇرمەدەن ءبىر- اق شىققاندارىن جازعان ەدى.

«وزودليق» مانبەسىنىڭ اقپارىنا سايكەس، دجاحونگير گۋلوموۆ ناعاشى اعاسى دجاۆدات شاريفحودجايەۆپەن بىرگە گۋلنارا كاريموۆانىڭ دۇنيە- مۇلىكتەرىن تاركىلەۋ ۇدەرىسىنە قاتىسقان بولاتىن. مانبەلەر وسى ورايدا گۋلنارا كاريموۆانىڭ ءبىرقاتار باتىس باسپا سوزىنە بەرگەن سۇحباتتارى مەن Twitter الەۋمەتتىك جەلىسىندە اتتارىن اتاعان شەنەۋنىكتەرىنىڭ ءبارىنىڭ ىستەرى ءقازىر «ونشا بولماي تۇرعانىنا» نازار اۋدارۋدا.

ولار گۇلنارا كاريموۆاعا قاتىستى ءىس- شارا كەزىندە شامادان تىس بەلسەندىلىك تانىتىپ جىبەرگەن شەنەۋنىكتەردىڭ «الدەكىمگە ۇناماي قالعان بولۋلارى مۇمكىن» ەكەنىن، سول سەبەپتى پرەزيدەنتتىڭ قىزىنا «قول كوتەرۋگە» باتىلدارى بارعان بۇرىنعى چەكيستەرگە جىلجىمايتىن مۇلىكتەرىن قيراتىپ، زاتتارىن تاركىلەۋ تۇرىندە جازا قولدانىلىپ جاتقانىن العا تارتادى.

حابارلانعانداي، گۋلنارا كاريموۆانىڭ ءوزى بولسا، قازىرگى كۇندەگى تاشكەنتتە ءۇي قاماقتا وتىر. ول بۇدان بۇرىنىراقتا بەرگەن ينتەرۆيۋلەرىندە مۇنى وزىنە «ىقپالدارىن كۇشەيتۋ ءۇشىن» اناسى مەن اكەسى يسلام كاريموۆتىڭ جانىندا جۇرگەندەردىڭ ۇيىمداستىرىپ وتىرعاندارىن مالىمدەگەن بولاتىن.