11:11, 20 - شىلدە 2015 | GMT +5
پوليتسەيلەرگە شابۋىل جاساعان ەر ادام اجال قۇشتى
استانا. قازاقپارات - قىتايلىق لويان قالاسىندا پوليتسيا نارازىلىق بىلدىرگەندەرگە قاتىستى قارۋ قولدانۋعا ءماجبۇر بولدى.
شينحۋا اگەنتتىگى حابارلاعانداي، ءبىر ادام قازا تاپتى، تاعى بىرەۋى جاراقاتتاندى.
وقيعا جەرگىلىكتى قۇرىلىس ورىندارىنىڭ بىرىندە بولعان. 10 ادامنان قۇرالعان توپ نىسان اۋماعىنا قۇرىلىسقا ارنالعان ارنايى تەحنيكانى كىرگىزۋگە كەدەرگى كەلتىرگەن.
جانجالدى رەتتەۋگە پوليتسەيلەر كەلگەن. كەلىسسوزدەر كەزىندە نارازىلىق بىلدىرگەندەردىڭ ەكەۋى پوليتسەيلەرگە تۇرا ۇمتىلادى. ءتارتىپ ساقشىلارى ەسكەرتۋ رەتىندە ەكى رەت اسپانعا وق اتقان. الايدا ولاردىڭ قارۋلارىن تارتىپ الماققا ارەكەتتەنگەندەر مۇنى ەلەمەگەن دە. سالدارىنان ءبىر ادام مەرت بولىپ، تاعى بىرەۋى جاراقاتتاندى.
لويان قالاسىنىڭ پروكۋراتۋراسى مەن قوعامدىق قاۋىپسىزدىك باسقارماسى تەرگەۋ امالدارىن باستادى.
اۆتور: قانات مامەتقازى ۇلى
