ستامبۇلدا قابانباي باتىر اتىنداعى فۋتبولدان تۋرنير ءوتتى

استانا. قازاقپارات - ورازا ايت مەرەكەسىندە تۇركيانىڭ ستامبۇل قالاسىندا تۇركيا قازاقتارىنىڭ ءداستۇرلى قۇرىلتايى باستالدى.

وعان بيىل انادولى جەرىندە تۇراتىن قانداستارىمىزبەن بىرگە ەۋروپا مەن قازاقستاننان ارنايى كەلگەن قوناقتار دا قاتىسۋدا، دەپ حابارلادى 24.kz.

 قازاق مادەني قورىنىڭ ۇيىتقى بولۋىمەن ءوتىپ جاتقان بيىلعى القالى جيىن فۋتبولدان جاستار اراسىندا «قابانباي باتىر» تۋرنيرىمەن باستالدى. ۇيىمداستىرۋشىلار وسكەلەڭ ۇرپاققا قازاق باتىرلارىن كەڭىنەن ناسيحاتتاۋ ءۇشىن ولاردىڭ قۇرمەتىنە جىل سايىن ءبىر سپورتتىق شارا وتكىزىپ تۇرادى. ەستە بولسا، بىلتىرعى سايىس قازاقتىڭ حاس باتىرى ەر جانىبەكتىڭ 300 جىلدىعىنا ارنالعان بولاتىن.

فۋتبولدان بولەك وسى جولعى باس قوسۋدا قازاق حاندىعىنىڭ 550 جىلدىعىنا ارنالعان كونفەرەنسيا مەن اقىندار ايتىسى دا وتەدى دەپ جوسپارلانۋدا. ال 4 كۇنگە سوزىلاتىن تۇركيا قازاقتارىنىڭ قۇرىلتايى قازاقستاندىق انشىلەردىڭ گالا- كونسەرتىمەن اياقتالادى دەپ حابارلايدى 24.kz تەلەارناسىنىڭ تۇركياداعى ءتىلشىسى ەرجان ءجۇنىس.