حوببيىڭدى بيزنەسكە اينالدىر

استانا. قازاقپارات - شاعىن قالا، مەيلى، الىپ مەگاپوليس بولسىن، كاسىپكەرلىكتى قولدايتىن ءتۇرلى تەتىكتەر قاراستىرىلعان.

اسىرەسە، ءوز بيزنەسىن اشام دەگەن جاستاردى قولتىعىنان دەمەۋگە ارنالعان ءتۇرلى گرانتتار بار. سەنبەيسىز بە؟

يننوۆاتسيالىق گرانتتىڭ قىزىعىن كورگەن جاس كاسىپكەرلەر جانىڭىزدا ءجۇر.

شاحتينسك قالاسىنىڭ تۇرعىنى، بيزنەسىن جاڭا باستاعان اندرەي وسياننيكوۆ وتكەن جىلى يننوۆاتسيالىق بيزنەس- جوبالار كونكۋرسىنا قاتىسىپ، «ءبىرسالالى شاعىن قالالاردى دامىتۋ باعدارلاماسى» ۇسىنعان گرانتتى ۇتىپ الدى.

گرانت كولەمى - 3 ميلليون تەڭگە. سوڭعى 6 جىلدان بەرى تەرىدەن ءتۇرلى اسەمدىك بۇيىمدار، سۋۆەنيرلەر، سومكەلەر مەن بەلبەۋلەر تىگىپ جۇرگەن اندرەي ەندى بۇل ءىستى جەكە قىزىعۋشىلىق دەڭگەيىنەن بيزنەس تۇرىنە اينالدىردى. ول ءۇشىن باستاپقى قارجىنى مەملەكەت بەرىپ وتىر. جوبانىڭ ارقاسىندا 5 جۇمىس ورنى اشىلادى. سونىڭ ارقاسىندا مەملەكەتكە جىلىنا 1 ميلليون تەڭگەگە جۋىق سالىق ءتۇسىپ وتىرادى.

- گرانت بولگەن اقشاعا تەرىدەن ءتۇرلى بۇيىمدار تىگەتىن قىتايلىق قۇرىلعىلار ساتىپ الدىم. سونداي- اق، ءبىراز ۋاقىتقا جەتەتىن شيكىزات جەتكىزىلدى. بۇگىندە رەسەيلىك تەرىلەردىڭ ساپاسى كوڭىلدەن شىعىپ تۇر. سوندىقتان ريازان تەرى زاۋىتىمەن ىنتىماقتاستىقتى بارىنشا دامىتىپ جاتىرمىز، - دەيدى اندرەي وۆسياننيكوۆ.

اندرەيدىڭ ماماندىعى - تاۋ-كەن ينجەنەرى. ءبىراق تىگىنشى اناسىنان كورىپ وسكەن تاعلىمى ونى ءبارىبىر وسى سالاعا اكەلدى. ءبىر سومكەنى ەكى كۇندە تىگىپ تاستايمىن دەيدى ول. قولىنان شىققان بۇيىمنىڭ اسەم ءارى ەكسكليۋزيۆتى ديزاينمەن جاسالۋىنا ەرەكشە ءمان بەرەتىنىن ماقتانىشپەن ايتادى قولونەرشى جىگىت.

جالپى، باعدارلاما قابىلدانعالى شاحتينسك قالاسىنىڭ 8 كاسىپكەر 24 ميلليون تەڭگەنىڭ گرانتىنا قول جەتكىزگەن. سونىڭ ارقاسىندا شاعىن قالانىڭ 45 تۇرعىنى جۇمىسپەن قامتىلادى دەگەن سەنىم بار.

مەملەكەت بولگەن گرانتتىڭ تاعى ءبىرى تارازدىق انار بەكسۇلتانوۆاعا بۇيىردى. بۇل باسقا باعدارلاما - «بيزنەستىڭ جول كارتاسى-2020». وندا دا يننوۆاتسيالىق يدەيالارعا 3 ملن تەڭگە كولەمىندە گرانت قاراستىرىلعان.

اناردىڭ تۋمىسىنان ەكى قولى جوق. الايدا، ول مۇنى ويلاپ قامىققان ەمەس. قاتارىنىڭ الدى بولىپ، مەكتەپتى، سوسىن ۋنيۆەرسيتەتتى اياقتادى. قولمەن جاسالاتىن شارۋالاردى اياعىمەن اتقاردى. سول اياقتارىنىڭ كومەگىمەن ءتۇرلى قولونەر بۇيىمدارىن ىسمەرلەپ، كورپە- جاستىق تىگىپ ءجۇر. انار سۋرەت سالۋعا قۇشتار.

بالا كەزدەن تابيعاتتىڭ شەكسىز سۇلۋلىعىنا تامسانىپ، اياعىمەن ءتۇرلى كەسكىندەر سالا باستاعان. نەگىزىنەن، پەيزاج بەن ناتيۋرمورت سالعاندى جانى سۇيەدى. ونداي بەساسپاپ، ىسمەر جانداردى قازاق «ون ساۋساعىنان ونەر تامعان» دەپ سيپاتتاسا، انار تۋرالى البەتتە ولاي ايتا المايسىز. سونىڭ بارلىعىن اياقتارىنىڭ كومەگىمەن اتقارىپ جۇرگەنى ومىرگە دەگەن قۇشتارلىعى مەن ەنجارلىق دەگەندى جانى سۇيمەيتىن ەڭبەكقورلىعىنان بولسا كەرەك. ونىڭ ۇستىنە، اناردى ۇنەمى بولاشاققا جەتەلەپ، ارمانىن ايالاۋعا يتەرمەلەيتىن فاكتورلار بارشىلىق. ەڭ باستىسى - ول 6-7 جاسار ادەمى جانە سۇلۋ- ايىم اتتى قوس قۇلىنشاقتى تاربيەلەپ وتىرعان ارداقتى انا.

 انار دا اندرەي سياقتى گرانت بويىنشا العان 3 ملن تەڭگەسىنە تىگىن تىگۋگە قاجەتتى قۇرال- جابدىقتار ساتىپ الىپ، 5 تىگىنشىنى ءوز كاسىبىنە ەڭبەككە تارتقان. تىگىن تسەحى ءۇشىن عيمارات جالداپ اۋرە بولماي، اتەلەنى ءوز ۇيىنەن اشتى. «قىز جاساۋىن تىگەمىز. تاپسىرىس وتە كوپ، سوندىقتان كاسىبىمدى كەڭەيتەتىن كۇن دە الىس ەمەس»، دەيدى انار بەكسۇلتانوۆا.

جامبىل وبلىسىندا «بيزنەستىڭ جول كارتاسى-2020» باعدارلاماسىنىڭ گرانتتارى سوڭعى ەكى جىلدا 15 ادامعا بەرىلىپتى.

ولار 44 ميلليون تەڭگەنى مەملەكەتتەن قايتارىمسىز نەگىزدە الدى. ونىڭ ىشىندە كينو ءتۇسىرىپ جۇرگەن اۋەسقوي رەجيسسەر، مال شارۋاشىلىعىنا جاڭالىق ەنگىزگەن شوپان، سۇڭعىلادان ءدارى- دارمەك جاسايتىن فارماتسيەۆت، باسقا دا ءتۇرلى سالانىڭ وكىلدەرى بار.

دەمەك، ءوز سالاڭىزعا قاتىستى قانداي دا ءبىر يدەيالارىڭىز بولسا، ونى ىسكە اسىرۋعا مەملەكەت كومەكتەسەدى. ءتىپتى، بيزنەس- جوسپار جاساي المايمىن دەپ قامىقساڭىز، كاسىپكەرلەرگە قىزمەت كورسەتۋ ورتالىعىنداعى ماماندار تەگىن جوسپار جاساپ بەرەدى. ءارى قاراي ارنايى كونكۋرسقا قاتىسۋ عانا قالادى. گرانت - نەسيە ەمەس، ونى قايتارۋدىڭ قاجەتى جوق. دەمەك، كاسىبىڭنىڭ كەلەشەگىنە الاڭداۋعا دا نەگىز جوق.

 سايانا تاجيكەن