كوزدىڭ ءمولدىر قابىعىن اۋىستىرۋ بويىنشا وتا ەندى قازاقستاندا جاسالماق

الماتى. قازاقپارات - الماتىدا بەلگىلى وفتالمولوگ ءمادينا قۇرالوۆانىڭ «سەنتر زرەنيا» امبۋلاتوريالىق كوز ميكروحيرۋرگياسى ورتالىعى اشىلدى.

 ورتالىقتا كوز اۋرۋلارىن ەمدەۋدىڭ ەڭ جاڭا يننوۆاتسيالىق تەحنولوگيالارى قولدانىلاتىن بولادى. اتاپ ايتقاندا، كوزدىڭ ءمولدىر نۇرلى قابىعىن اۋىستىرۋ بويىنشا دا وتالار جاسالاتىن بولادى.

مامانداردىڭ ايتۋىنشا، كوبىنە گلاۋكوما، كاتاراكتا دەرتىنە شالدىققان ناۋقاستارعا نۇرلى قابىقتى اۋىستىرۋعا كەڭەس بەرىلەدى.

قازاقستاندا بۇگىندە 7-8 مىڭ ادام مۇنداي وتاعا مۇقتاج.

«اتالعان ورتالىقتىڭ اشىلۋى قازاقستاندىقتار ءۇشىن ۇلكەن وقيعا. ولار شەتەلگە شىقپاي ءوز ەلىندە كوزىنىڭ كورۋ جىتىلىگىن جاقسارتا الادى. سونداي- اق قازىر قازاقستاندا نۇرلى قابىقتى ترانسپلانتاتسيالاۋ بويىنشا وپەراتسيا جاسالمايدى. ويتكەنى قازاقستاندا كوز قابىعىن ساقتايتىن بانك جوق. ونى ءبىز رەسەيدەن ماسكەۋدەن الدىراتىن بولامىز. وسى باعىتتا رەسەيلىك ارىپتەستەرىمىزبەن ىنتىماقتاستىق ورناتىپ جاتىرمىز»، - دەدى «سەنتر زرەنيا» امبۋلاتوريالىق كوز ميكروحيرۋرگياسى ورتالىعىنىڭ ديرەكتورى ءمادينا نۇر- مۇحاممەد.

«ءبىزدىڭ باستى الەۋمەتتىك ماقساتىمىز كوزىنىڭ نۇرلى قابىعى ەمدەۋگە كەلمەيتىن ادامدارعا قايتادان جارىق سىيلاۋ. وسى ماقساتتا رەسەيدە كوزدىڭ نۇرلى قابىعىن جاساپ ساقتاۋعا باعىتتالعان بانك اشىلدى. ءبىز قازاقستاندىق ناۋقاستاردى دا قامتۋعا تىرىسامىز. مۇنداي جۇمىس كەيىن بولاشاقتا قازاقستاندا دا جاسالا باستايدى. مۇندا نۇرلى قابىقتى الىپ، ونى ساقتاۋدىڭ ءتارتىبىن ۇيىمداستىرىپ، جەرگىلىكتى ۇلتتىق بانك اشامىز»، - دەدى Nano Vision كومپانياسىنىڭ باس ديرەكتورى انتون ارحيپوۆ.

ساراپشىنىڭ بايانداۋىنشا، مۇنداي بانكتى اشۋعا 1 ميلليون ەۋرو ينۆەستيتسيا قاجەت. قابىق وڭدەلەتىن بولمەنىڭ تازالىعى وتا جاسايتىن بولمەنىڭ تازالىعىنان ون ەسە ارتىق بولۋ كەرەك. ءارى وڭدەيتىن اپپاراتتار، زەرتحانالىق قۇرىلعىلار قىمبات.

اۆتور: گۇلميرا عوسمانالي