فۋتبول: «اقجايىق» كومانداسىنا جاڭا باس باپكەر تاعايىندالدى
«ەڭ باستىسى، بۇرىننان بار ءداستۇردى جوعالتپاي، ويىنشىلار شەبەرلىگىن جەتىلدىرىپ، «اقجايىقتىڭ» پرەمەر- ليگاعا شىعۋىنا بار كۇش- جىگەرىمىزدى سالامىز»، - دەدى تالعات مارۋان ۇلى.
«اقجايىق» فۋتبول كلۋبىنان تۇسكەن مالىمەتكە قاراعاندا، ت. بايسۋفينوۆ - پاۆلودار فۋتبولىنىڭ تۇلەگى. پاۆلودارلىق كلۋب قۇرامىندا 180 ماتچ وتكىزىپ، 26 دوپ سوققان، سونىڭ ىشىندە قازاقستان چەمپيوناتىنداعى 110 ويىندا 17 گولدىڭ اۆتورى اتانعان. باسقا دا كوماندالاردا دوپ تەپكەن ت. بايسۋفينوۆ 1992 -جىلى قازاقستان قۇراماسىنا الىنعان.
تالعات بايسۋفينوۆ باپكەر رەتىندە ستەپنوگورسكىنىڭ «اقسۋ»، سونداي-اق «ەسىل- بوگاتىر»، 2008-2014 -جىلدارى پاۆلوداردىڭ «ەرتىسىن» جاتتىقتىرعان. جاتتىقتىرۋشى رەتىندە 2012 -جىلى قازاقستان چەمپيوناتىنىڭ كۇمىس، 2010 -جىلى قولا جۇلدەگەرى اتانعان، سونداي-اق 2012 -جىلى قازاقستان كۋبوگىنىڭ فينالىنا دەيىن جەتكەن.
ايتا كەتەيىك، پرەمەر- ليگاعا قايتا ورالۋدى ماقسات ەتىپ وتىرعان «اقجايىق» ءبىرىنشى ليگادا العاشقى اينالىمنان كەيىن نەبارى التىنشى ورىندا كەلەدى. كومانداعا سونىمەن قاتار ويىنشى رەتىندە بولگاريالىق لەگيونەر يانكو ۆالكانوۆ پەن «ماقتاارالدان» رومان قيسمەتوۆ الىنىپ وتىر. قورعاۋشى ي. ۆالكانوۆتىڭ «اقجايىقتىڭ» قۇرامىندا 2012 -جىلى ويناعانى بەلگىلى.
اۆتور: ەلجان ەرالى
