الماتىدا ءبىر ايەل مىسىعىن تۋدىرۋ ءۇشىن جەدەل جاردەم شاقىردى
بۇل تۋرالى تىلشىلەرگە دارىگەرلەر مالىمدەدى.
الماتىدا اپتاپ ىستىقتان جەدەل جاردەمگە حابارلاسۋشىلاردىڭ سانى كۇرت ارتقان. دارىگەرلەردىڭ ايتۋىنشا، كۇنىنە ورتا ەسەپپەن 2 مىڭعا جۋىق تۇرعىن حابارلاسىپ، دەنساۋلىقتارىنىڭ سىر بەرگەنىن ايتادى.
كوپ جاعدايدا باسى اۋىرىپ، ىشكى قۇرىلىسى دۇرىس جۇمىس ىستەمەي، قان قىسىمى كوتەرىلەتىن تۇرعىندار دارىگەرلەردىڭ كومەگىنە ءجيى جۇگىنەدى. ال كەيبىرى ولاردى ءجونسىز شاقىرتاتىن كورىنەدى.
"وسىدان ءبىر اپتا بۇرىن ءبىر ايەل حابارلاسىپ، تولعاتىپ جاتقانىن حابارلاعان بولاتىن. ءبىزدىڭ بريگادا بارسا، ول كىسىنىڭ مىسىعى تۋايىن دەپ جاتىر ەكەن. سول كىسىگە ارىز جازعان بولاتىنبىز"، - دەيدى №6 مەديتسينالىق جەدەل جاردەم ستانسياسى باس دارىگەرىنىڭ ورىنباسارى الەكساندر لازاريەۆ.
دارىگەرلەر مۇنداي ىستىق كۇندە ءار ادام كەمىندە 2,2 ليتر سۋ ءىشۋ كەرەگىن ايتادى. تىستا جۇرگەندە مىندەتتى تۇردە باس كيىم كيىپ، قولشاتىر العان ءجون.
