گەرمانيادا ناتسيستەردىڭ كومىپ كەتكەن التىنى تابىلدى - كەسكىن

بۇل ولجا ليۋنەبۋرگ قالاسىنىڭ ماڭىندا تابىلدى. 31 جاستاعى اۋەسقوي ارحەولوگ فلوريان باۋچ تەمىر ىزدەۋشى جابدىقتىڭ كومەگىمەن قاراعاي تۇبىنەن 10 التىن مونەتا تاپتى. كەيىن ول كاسىبي ارىپتەستەرىنىڭ كومەگىنە جۇگىندى. ارحەولوگتار بۇل جەردى قازىپ، وسىنداي تاعى 207 مونەتا تاپتى. عالىمداردىڭ پىكىرىنشە، قازىنا ناتسيستىك گەرمانيا كەزەڭىندە جاسىرىلعان. التىن يەسى قازىناسىن ەكىنشى دۇنيەجۇزىلىك سوعىستىڭ سوڭىندا كومىپ كەتۋى مۇمكىن.

ءاربىرىنىڭ ديامەترى 21 ميليمەتر، ال سالماعى 6 گرامنان اساتىن مونەتالار 1837-1910-جىلدار ارالىعىندا ءتۇرلى ەلدەردە جاسالعان. سونىمەن قاتار بۇل قازىنادان بەلگيالىق، فرانسۋز، يتالياندىق جانە اۆسترو-ۆەنگريالىق اقشا تابىلدى. ونىمەن قوسا ناتسيستىك بەلگىسى بار كارتون قالدىعى، «Reichsbank Berlin 244» جازۋى بار ءمور بولعان. عالىمدار بۇل قاپتامانىڭ 1940-1950-جىلدار ارالىعىندا جاسالعانىن انىقتادى.

قازىنا 19- شىلدەدە ليۋنەبۋرگ مۇراجايىندا جۇرتشىلىق نازارىنا ۇسىنىلادى.