ساق بيلەۋشىسىنىڭ ەسكەرتكىشى كەشەندى تۇردە زەرتتەلۋدە - فوتو

استانا. قازاقپارات - قازاقستان رەسپۋبليكاسى ۇلتتىق مۋزەيىنىڭ «حالىق قازىناسى» عىلىمي-زەرتتەۋ ينستيتۋتى مەن ءا. ح. مارعۇلان اتىنداعى ارحەولوگيا ينستيتۋتىنىڭ استانا قالاسىنداعى فيليالىنىڭ بىرلەسكەن زەرتتەۋ توبى الماتى وبلىسى رايىمبەك اۋدانىنىڭ قارقارا اۋىلدىق وكرۋگىنە قاراستى قارقارا جايلاۋىندا ساقتاردىڭ «پاتشالىق» ەسكەرتكىشىندەگى كەزەكتى قازبا جۇمىستارىن جالعاستىردى.

زەرتتەۋ ناتيجەسىندە ج. س. د. VI-V عاسىرلارعا جاتاتىن ساق بيلەۋشىسىنىڭ قۇرمەتىنە سالىنعان ءىرى كولەمدى ەسكەرتكىشتىڭ بىرنەشە قۇرىلىمدىق ەلەمەنتتەرى - جەر بەتىندەگى قۇرىلىمى، اينالا قورشاپ جاتقان تاس قورشاۋ قالاندىلار، ورلار اشىلدى. ساقتاردىڭ ارحيتەكتۋراسى، جەرلەۋ عۇرپى جانە دۇنيەتانىمى جايلى جاڭا مالىمەتتەر الىندى.

جەتىسۋلىق ساقتاردىڭ الەۋمەتتىك دارەجەسى جوعارى، بەدەلدى بيلەۋشىسى قويىلعان بۇل كەشەننىڭ اينالاسىنان ءتورت عاسىردان سوڭ عۇن-سارمات كەزەڭىندە، ءبىر مەزەتتە جەرلەنگەن 45 قورشاۋ-وبالار دا اشىلدى. قورشاۋلاردان باس كيىمنىڭ ىلمەكتى التىن قاپسىرما اشەكەيلەرى، مونشاقتار، قىش ۇرشىقتار ت. ب. تابىلدى، دەپ حابارلادى ق ر ۇلتتىق مۋزەيىنىڭ «حالىق قازىناسى» عىلىمي-زەرتتەۋ ينستيتۋتىنان.