باس ءمۇفتي ەرجان قاجى مالعاجى ۇلى مۇسىلمانداردى ورازا ايت مەرەكەسىمەن قۇتتىقتادى
قازاقستان باس ءمۇفتيىنىڭ قۇتتىقتاۋىن وقىرمان نازارىنا ۇسىنامىز.
ورازا ايت مۇباراك بولسىن، باۋىرلار!
قۇرمەتتى باۋىرلار!
ورازا ايت مەرەكەسىنە امان- ەسەن جەتكىزگەن اللا تاعالاعا سانسىز شۇكىرلەر مەن ماداقتار بولسىن. بارشا حالىقتى مۇسىلمان قاۋىمىنىڭ ۇلىق، قاستەرلى مەرەكەسى ورازا ايت مەيرامىنىڭ باستالۋىمەن قۇتتىقتايمىن. ايت مۇباراك بولسىن، اعايىن!
قاسيەتتى رامازان ايىنىڭ اياقتالعانىن بىلدىرەتىن ورازا ايت مەيىرىمدىلىكتىڭ، يگىلىكتىڭ، بىرلىكتىڭ، ىزەتتىلىكتىڭ، قايىرىمدىلىقتىڭ مەرەكەسى. بۇل مەيرام بارشا حالىقتى ىزگىلىككە ۇيىتادى.
كەڭپەيىل، باۋىرمال، قوناقجاي، دارحان مىنەزدى مۇسىلمان حالقىمىز ورازا ايتتى ەرەكشە اتاپ وتكەن.
بيىل ەلىمىزدىڭ مۇسىلماندارى دا قاسيەتتى رامازاندا اۋىز بەكىتىپ، شاراپاتى مول ايدا جاسالعان ىزگى ءىس- شارالارىمىزعا اتسالىستى. مەشىتتەرىمىزدە اۋىزاشارلار مەن قايىرىمدىلىق اكتسيالار ءوتتى. تۇرمىس جاعدايى تومەن وتباسىلارىنا كومەك كورسەتىلدى. ساۋابى تەڭدەسسىز وسىناۋ جاقسى ىستەرگە ۇلەس قوسقان وتانداستارىما «اللا رازى بولسىن» ايتامىن.
«ايت» ءسوزى «قارىمتا» دەگەن ماعىنانى بىلدىرەدى. جاراتۋشى يەمىز ءاربىر ىزگى امال مەن يگىلىكتى ءىستىڭ ساۋابىن بەرىپ، مەيىرىم- شاپاعاتىن توگەدى. ورازا ايت ءبىر اي بويى ورازا ۇستاپ، ىقىلاسپەن جاقسىلىق جاساعان ادامنىڭ قۇرمەتكە، ماراپاتقا يە بولاتىن كەزى. اللا بارشامىزدى مول ساۋاپقا كەنەلگەن قۇلدارىنىڭ قاتارىنا قوسۋىن تىلەيمىن.
ايت كۇنىندە تولىق جۋىنىپ، جۇپار ءيىس سەبىنىپ، جاماعاتپەن ايت نامازىنا قاتىسۋدىڭ ساۋابى ەرەكشە. ايت نامازىنا بارۋدان الدىن قۇرمادان ءدام تاتۋ پايعامبارىمىز مۇحاممەدتىڭ (اللانىڭ وعان سالاۋاتى مەن سالەمى بولسىن) سۇننەت امالى.
اعايىن- تۋىستى، كورشىلەر مەن وزگە ۇلت وكىلدەرىن ورتاق مەرەكەمەن قۇتتىقتاپ، جىلى شىراي تانىتىپ، تىلەۋلەستىك ءبىلدىرۋ دە يگى امال.
قادىرلى اعايىن!
بارشا وتانداستارىمدى ورازا ايتتىڭ قۇرمەتى ءۇشىن ءبىر-ءبىرىمىزدى كەشىرىپ، ءوزارا تاتۋلىعىمىزدى نىعايتىپ، اۋەلى اللانىڭ، اتا- انامىزدىڭ
قۇرمەتى مەن ريزالىعىنا بولەنۋگە شاقىرامىن.
اللا تاعالا ۇستاعان ورازالارىمىزدى، دۇعا- تىلەكتەرىمىزدى قابىل ەتكەي! حالقىمىزدىڭ بىرلىگى مەن ىنتىماعى ارتىپ، تاۋەلسىزدىگىمىزدىڭ تۇعىرى بيىك، ەلباسى باستاعان ەگەمەن ەلىمىزدىڭ بولاشاعى باياندى بولعاي!
ورازا ايت قۇتتى بولسىن!
ەرجان قاجى مالعاجى ۇلى، قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي
