07:48, 16 - شىلدە 2015 | GMT +5
يسپانيا ازاماتتاردىڭ نەكەگە تۇرۋ جاس مولشەرىن وزگەرتتى
استانا. قازاقپارات - يسپانيادا سارسەنبى كۇنى «ەرىكتى يۋريسديكتسيا تۋرالى» زاڭ قابىلدانۋىنا بايلانىستى ازاماتتاردىڭ نەكەگە تۇرۋ جاس مولشەرى 16 جاس دەپ وزگەرتىلدى، دەپ حابارلادى BBC اگەنتتىگى.
يسپانيانىڭ ازاماتتىق كودەكسى بويىنشا بۇعان دەيىن 14 جاسقا تولعان ەلدىڭ ازاماتتارى سۋديانىڭ رۇقساتىمەن زاڭدى نەكەگە تۇرا الاتىن بولعان.
بۇل تاجىريبە بويىنشا سوڭعى جىلدارى نەكەگە تۇرۋشىلار سانى ازايعان. ناقتىراق ايتقاندا، بىلتىر 14 جاسقا تولعان ازاماتتار اراسىندا تەك 5 نەكە عانا تىركەلگەن. ال، 1975-جىلدان بەرى 16 جاستان تومەن ازاماتتار اراسىندا بارلىعى 28690 نەكە قيىلدى.
جاڭا زاڭدا جاسوسپىرىمدەردى جىنىستىق قاتىناسقا كۇشتەپ كوندىرۋدىڭ الدىن الۋ قاراستىرىلعان.
ايتا كەتۋ كەرەك، يسپانيادا بۇكىل ەۋرووداق ەلدەرى اراسىندا ازاماتتاردىڭ نەكەگە تۇرۋ جاسى ەڭ تومەن بولىپ كەلگەن.
