قىتايدىڭ التاي قالاسىندا قازاقشا كۇرەستەن ازيا چەمپيوناتى ءوز مارەسىنە جەتتى - فوتو

استانا. قازاقپارات - قازاق كۇرەسىنىڭ قادامى بۇگىنگى تاڭدا قارىشتاي تۇسۋدە. ونىڭ ايعاعى وسى اتا كۇرەسىمىزدەن ءوتىپ جاتقان الەم، ەۋروپا جانە ازيا سايىستارى بولىپ تابىلادى.

مىنە، ءتول كۇرەسىمىزدەن تاعى ءبىر ءسۇيىنشى حابار قىتايدىڭ شىنجاڭ ۇيعىر اۆتونوميالى ولكەسىنە قاراستى التاي قالاسىنان كەلىپ جەتتى.

19 مەملەكەتتىڭ سپورتشىلارى قاتىسۋمەن وتكەن 11- رەتكى قۇرلىقتىق دوداعا 60 جانە 70 كەلى سالماقتا جەرلەستەرىمىز قۋانىش ىسقاقوۆ پەن قۋانىش ءسابيتوۆ توپ جارسا، 80 كەلىدە باس جۇلدەنى قىتايلىق قانداسىمىز امانجول ۇسەنتاي قانجىعاسىنا بايلادى. بۇل تۋرالى ق ر ۇلتتىق سپورت تۇرلەرى قاۋىمداستىعىنىڭ باسپا ءسوز قىزمەتىنەن حابارلادى.

جەرلەسىمىز عاني سەيدىلدايەۆ تۇيە بالۋان اتانىپ، التىننان القا تاقتى. سونىمەن ۇلتتىق قۇرامامىزدىڭ قورجىنى 8 مەدالعا تولىقتى. ونىڭ بەسەۋى التىن، ەكەۋى كۇمىس جانە بىرەۋى قولا مەدال.

ەسكە سالا كەتەيىك ازيا چەمپيوناتى قىتاي جەرىندە ەكىنشى رەت وتكىزىلىپ وتىر. وسىدان ءبىر جىل بۇرىن گانسۋ پروۆينتسياسىنا قاراستى اقساي قازاق اۋدانىندا وتكەن بولاتىن. كەلەسى الەم چەمپيوناتى دا سوندا بولادى دەپ جوسپارلانۋدا. بۇل جولعى كەزدەسۋدە جالپى ەسەپ بويىنشا قازاقستان ءبىرىنشى ورىندى يەلەندى.