بۇگىن قازاقستاننىڭ باسىم بولىگىندە قاتتى ىستىق ساقتالادى

استانا. قازاقپارات - 16- شىلدە كۇنى قازاقستاننىڭ باسىم تەرريتورياسىن انتيتسيكلون انىقتايدى، وسىعان بايلانىستى اۋا رايى جاۋىن- شاشىنسىز بولادى، تەك رەسپۋبليكانىڭ باتىسىنىڭ كەي جەرلەرىندە وتكىنشى جاڭبىر جاۋىپ، نايزاعاي بولادى. جەكەلەگەن اۋداندارىندا جەل سوعىپ، وڭتۇستىگىندە شاڭدى داۋىلمەن جەل بولادى.

بۇل تۋرالى قازگيدرومەت حابارلادى. وڭتۇستىك قازاقستان، جامبىل وبلىستارىنىڭ كەي جەرلەرىندە جەل شاڭدى داۋىلمەن 15-20 م/س كۇشەيەدى. اتىراۋ وبلىسىندا، كۇندىز ماڭعىستاۋ، باتىس قازاقستان وبلىستارىنىڭ كەي جەرلەرىندە جەل 15-20 م/س كۇشەيەدى. كۇندىز جامبىل وبلىسىندا، قىزىلوردا، الماتى، وڭتۇستىك قازاقستان، قاراعاندى وبلىستارىنىڭ كەي جەرلەرىندە وتە قاتتى ىستىق، اتىراۋ وبلىسىندا، اقمولا، ماڭعىستاۋ، اقتوبە، باتىس قازاقستان، قوستاناي شىعىس قازاقستان وبلىستارىنىڭ كەي جەرلەرىندە قاتتى ىستىق كۇتىلەدى.

اقتوبە، قىزىلوردا، وڭتۇستىك قازاقستان، جامبىل وبلىستارىنىڭ باسىم بولىگىندە، اتىراۋ، باتىس قازاقستان، قاراعاندى، الماتى، شىعىس قازاقستان وبلىستارىندا وتە جوعارى ءورت قاۋىپى ساقتالادى.