قازاقستاندىق بانكتەر ماسەلەلى قارىزداردىڭ كورسەتكىشىن ايتارلىقتاي ازايتتى
«ماسەلەلى قارىزدار كورسەتكىشى ايتارلىقتاي ازايدى. قازىر 1- شىلدەدەگى كورسەتكىش بويىنشا %13 قۇراپ وتىر. ەستەرىڭىزگە سالا كەتسەك، 2013-جىلدىڭ اياعىندا جۇمىس ىستەمەيتىن بانك قارىزدارىنىڭ سوماسى %31,2 نەمەسە 4,2 تريلليون تەڭگەنى قۇراعان ەدى.
ۇلتتىق بانك ەلباسىنىڭ تاپسىرماسىنا سايكەس، 2015-جىلى بانكتىڭ ماسەلەلى قارىزىن 15 پايىزعا، 2016-جىلدىڭ 1- قاڭتارىنا دەيىن 10 پايىزعا دەيىن تومەندەتۋ ءۇشىن ارنايى سالىقتىق زاڭدىلىققا وزگەرىستەر ەنگىزىپ، بانكتەردىڭ قارىزىن ازايتۋ ماقساتىندا بىرەگەي ساياسات دايىندادى. ماسەلەلى قارىزداردى باعالاۋ جانە ونى ازايتۋ ءۇشىن كوميسسيا قۇردى، ول كوميسسيادا بانكتەر ءار 10 كۇن سايىن قارىزدىڭ اۋقىمىن ازايتۋ ءۇشىن نە جاسالىپ جاتقانى تۋرالى حابارلاپ، ەسەپ بەرىپ وتىرادى»، - دەيدى كەلىمبەتوۆ.
ونىڭ ايتۋىنشا، 2016-جىلدىڭ 1- قاڭتارىنا دەيىن بانكتەر ءوز قورجىنىنداعى ماسەلەلى قارىزدى 10 پايىزعا دەيىن ازايتۋعا مىندەتتى. ەگەر دە ازايتپاسا، بانكتەردىڭ ليتسەنزياسىن قايتارىپ الۋ، مەنەدجمەنتىن وزگەرتۋگە دەيىن ءىس-شارالار جاسالادى.
2004-2009-جىلدارى يپوتەكالىق قارىز العان ازاماتتاردىڭ قارىزىن قايتا قارجىلاندىرۋ بويىنشا 130 ميلليارد تەڭگە ءبولىندى. ول قارجى نەسيەنىڭ پايىزدىق ۇستەماقىسىن 3 پايىزعا دەيىن ازايتىپ، تولەۋ مەرزىمىن 20 جىلعا دەيىن سوزۋعا مۇمكىندىك بەرەدى.
«ۇلتتىق بانك پەن ۇكىمەتتىڭ ءىس-شارالارى بانك جۇيەسىن ساۋىقتىرىپ قانا قويماي، ەلدەگى نەسيەلەۋ جاعدايىن كادىمگىدەي جاقسارتادى. ماسەلەلى نەسيەلەردەن قۇتىلعان بانكتەر مەملەكەتتەن ۇزاق مەرزىمدىك قارجىعا قول جەتكىزىپ، ورتا جانە شاعىن بيزنەسكە، حالىققا نەسيە بەرە باستايدى»، - دەپ اتاپ ءوتتى ۇ ب ءتوراعاسى.
اۆتور: ءابۋ-اسقار مەكەش ۇلى
