ەكس- پرەمەر س. احمەتوۆ جانە وزگە دە بۇرىنعى لاۋازىمدى تۇلعالارعا قاتىستى قىلمىستىق ءىس سوت وندىرىسىنە قابىلداندى

 قاراعاندى. قازاقپارات - بۇرىنعى پرەمەر- مينيستر سەرىك احمەتوۆ جانە قاراعاندى وبلىسىنىڭ وزگە دە بۇرىنعى لاۋازىمدى شەنەۋنىكتەرىنە قاتىستى قىلمىستىق ءىسى سوت وندىرىسىنە قابىلداندى.

 بۇل تۋرالى قاراعاندى وبلىسى بويىنشا قىلمىستىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتىنەن حابارلاندى.

 «ءىس سوت وندىرىسىنە قابىلداندى. ءىستى سۋديا يسلامحان ەسەنبايەۆ قارايدى. اۋەلى ءىس بويىنشا الدىن الا تىڭداۋ تاعايىندالادى. نەگىزگى سوت تامىز ايىندا باستالادى دەپ كۇتىلۋدە»، دەلىنگەن حابارلامادا.

 بۇعان دەيىن قاراعاندى وبلىستىق پروكۋراتۋراسى حابارلاعانداي، باقىلاۋ ورگانى بۇرىنعى پرەمەر- مينيستر س. ن. احمەتوۆكە، وبلىستىڭ ەكس- اكىمى ب. ت. ابدىشيەۆكە، قاراعاندى قالاسىنىڭ ەكس- اكىمى م. ا. سماعۇلوۆقا جانە باسقا دا وبلىس اكىمشىلىگىنىڭ لاۋازىمدى قىزمەتكەرلەرى مەن بيزنەسمەندەرگە قاتىستى قىلمىستىق ءىس ماتەريالدارىن زەردەلەۋدى اياقتادى. سىبايلاس جەمقورلىق ءىسى بويىنشا بارلىعى 21 ادام تەرگەلۋدە. ولار قىزمەت بابىن اسىرا پايدالاندى، بيۋدجەت قاراجاتىن ۇرلادى جانە كاسىپكەرلىك قىزمەتكە زاڭسىز ارالاستى دەگەن ايىپتار تاعىلعان.

سونداي- اق، س. ن. احمەتوۆ اسا ءىرى كولەمدە پارا العاندىعى ءۇشىن دە ايىپتالىپ وتىر. قىلمىستىق ءىس ماتەريالدارى 300 دەن استام تومنان تۇرادى.

 «2015 - جىلعى 13 - شىلدەدە جوعارىدا اتالعان ادامدارعا قاتىستى قىلمىستىق ءىس ءمانى بويىنشا قارالۋى ءۇشىن قاراعاندى وبلىسى بويىنشا قىلمىستىق ىستەر جونىندەگى مامانداندىرىلعان اۋدانارالىق سوتىنا جولداندى. ايىپتالۋشىلار سوتقا بەرىلدى»، دەلىنگەن حابارلامادا.

تەرگەۋ نۇسقاسى بويىنشا، س. احمەتوۆ 1 ميلليارد تەڭگەدەن استام بيۋدجەت قاراجاتىن جىمقىرىپ، 2,4 ميلليون  ا ق ش دوللارى كولەمىندە پارا العان.

ەسكە سالا كەتەيىك، س. احمەتوۆ سەگىز ايدان بەرى ءۇي قاماقتا. تەرگەۋ وقشاۋلاعىشىندا سوتتى تاعى بەس ادام كۇتۋدە. ولاردىڭ ىشىندە وبلىستىڭ بۇرىنعى اكىمى ب. ابدىشيەۆ، قاراعاندىنىڭ بۇرىنعى اكىمى م. سۇماعۇلوۆ بار. قالعان قاتىسۋشىلارعا قاتىستى قوعامنان وقشاۋلاۋدان تىس بۇلتارتپاۋ شارالارى قابىلداندى.