پروكۋراتۋرا بالالاردى جىنىستىق زورلاۋ قىلمىستارىنىڭ الدىن الۋ ءۇشىن پەدوفيلدەرگە حيميالىق كاستراتسيا جاساۋدى ۇسىنادى
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە زورلىق- زومبىلىقپەن بايلانىستى، ونىڭ ىشىندە كامەلەتكە تولماعاندارعا قاتىستى قىلمىستىق قۇقىق بۇزۋشىلىقتارعا قارسى كۇرەس ماسەلەلەرى بويىنشا باسپا ءسوز ءماسليحاتىندا ق ر باس پروكۋراتۋراسى قىلمىستىق ۇدەرىستىڭ سوتقا دەيىنگى كەزەڭىنىڭ زاڭدىلىعىن قاداعالاۋ جونىندەگى دەپارتامەنتىنىڭ باسشىسى قۇسايىن يگەمبايەۆ ايتتى.
«پروكۋراتۋرانىڭ ۇيلەستىرۋ كەڭەسى جۋىردا وتكەن وتىرىسىندا جاسوسپىرىمدەر مەن كامەلەتكە تولماعاندارعا جىنىستىق زورلىق جاساۋ قىلمىستارىنىڭ الدىن الۋ ماسەلەلەرىن تالقىلاپ، وسى قىلمىسپەن كۇرەسۋدى ءبىرشاما وڭتايلاندىراتىن ۇسىنىستاردى ىشكى ىستەر ورگاندارىنا جولداعان بولاتىن. ماسەلەن، كامەلەتكە تولماعاندارعا جىنىستىق زورلىق جاساعان ادامداردىڭ پسيحيكاسىندا پاتالوگيا بار ما، جوق پا دەگەندى انىقتاۋ ءۇشىن ولارعا مىندەتتى تۇردە پسيحولوگيالىق- پسيحياتريالىق ساراپتاما جاسالۋى كەرەك. ەگەر ونداي پاتولوگيا بار بولسا، ونىڭ تاعى دا وسىنداي قىلمىس جاساۋىنىڭ الدىن الۋ ءۇشىن حيميالىق كاستراتسيا جاساۋ كەرەك دەگەندى ۇسىنامىز. بۇگىندە بۇل ماسەلە مەملەكەتتىك ورگانداردا قارالىپ جاتىر»، - دەپ اتاپ ءوتتى ول.
ق. يگەمبايەۆتىڭ ايتۋىنشا، پروكۋراتۋرا ىشكى ىستەر ورگاندارىنا وسىنداي جىنىستىق زورلاۋ قىلمىستارىمەن كۇرەسەتىن، ونى اشاتىن، تەرگەيتىن ارنايى بولىمدەر بولۋ كەرەك دەگەن ۇسىنىستار جاساعان. بۇگىندە ونداي شارالار مينيسترلىكتە قولدانىلىپ جاتىر. جانە دە جىنىستىق زورلاۋ قىلمىسى بويىنشا سوتتالعان ادامعا تۇراقتى تۇردە اكىمشىلىك قاداعالاۋ ورناتۋ قاجەت دەگەن ۇسىنىستار دا بار.
«تاعى ءبىر ۇسىنىس - ەلەكتروندى قۇرالدار ارقىلى پەدوفيلدەردى ىزدەپ تابۋ تۋرالى ادىستەمە جانە جەدەل ىزدەستىرۋ امالدارىنىڭ الگاريتمىن قۇرۋ جۇمىسى تاعى دا وسى ىشكى ىستەر ورگاندارىنا تاپسىرىلدى. وسىنداي ادىستەمە مەن الگاريتم بولاتىن بولسا، ءبىز كوپ جاعدايدا ينتەرنەت ارقىلى دا بالالار پورنوگرافياسى بار سايتتارعا ءجيى كىرەتىن ادامداردى انىقتاپ، الدىن الۋ شارالارىن قولدانۋعا ۇلكەن مۇمكىندىك بولادى دەپ ويلايمىز»، - دەيدى دەپارتامەنت باسشىسى.
اۆتور: ءابۋ- اسقار مەكەش ۇلى
