قاراعاندى وبلىسىندا وندىرىلەتىن بيەنىڭ قۇرعاق سۇتىنە جاپوندىقتار قىزىعۋشىلىق تانىتۋدا

استانا. قازاقپارات - قاراعاندى وبلىسى وساكاروۆ اۋدانى دالني اۋىلدىق وكرۋگىندە بيە ءسۇتىنىڭ كەپتىرىلگەن قۇرعاق ۇنتاعىن شىعارۋ جوباسى ىسكە قوسىلدى.

بۇل تۋرالى ۇلتتىق كاسىپكەرلەر پالاتاسىنىڭ باسپا ءسوز قىزمەتىنەن حابارلادى.

قۇنى 830 ميلليون تەڭگە «ەۆرازيا ينۆەست ل ت د» ج ش س جوباسى «قازاگروقارجى» ا ق ءىشىنارا كرەديتتىك قاراجاتىمەن ىسكە اسىرىلدى. كەلەشەكتە كاسىپورىن ءوندىرىس كولەمىن جىلىنا 10 تونناعا دەيىن جەتكىزۋدى جوسپارلاۋدا. ءونىم بولىگىن ەۋرووداق ەلدەرىنە ەكسپورتتاۋعا نيەتتى. قۇرعاق بيە ءسۇتى تاعام، فارماتسيەۆتيكالىق، كوسمەتولوگيالىق ونەركاسىپتە پايدالانۋعا بولادى.

كومپانيا باسشىسى عالىمجان مەيرامبەكوۆ ازىق-تۇلىك، فارماتسيەۆتيكا، مەديتسينا تەحنولوگياسى سالاسىندا سوڭعى الەمدىك ازىرلەمەلەردى قولدانا وتىرىپ، زاماناۋي جوعارى تەحنولوگيالىق يننوۆاتسيالىق ءوندىرىستىڭ قۇرىلعانىن اتاپ ءوتتى. استانا مەن قاراعاندىعا جاقىن ورنالاسقاندىقتان، كومپانيا وتكىزۋ جاعىنان پروبلەما بولمايتىنىنا سەنىمدى.

«قۇرعاق ءسۇت ارنايى قوندىرعىدا ۆاكۋۋمدىق كەپتىرۋ ارقىلى دايىندالادى. بۇل بيە ءسۇتىنىڭ بارلىق پايدالى قاسيەتتەرىن ۇزاق مەرزىمگە ساقتاۋعا مۇمكىندىك بەرەدى»، - دەدى كاسىپورىن ديرەكتورى.

گەرمانيادا تابىن جايىلىمىنا شەكتەۋ قويىلعاندىقتان، بيەلەردى جىل بويى قورادا ۇستايدى. بۇل ءسۇت ساپاسىنا تەرىس اسەر ەتەدى. بىزدەگى ءتۇرلى ساپالى ءشوپ ەۋروپا شوپتەرىمەن سالىستىرۋعا كەلمەيدى، سوندىقتان نەمىس كاسىپكەرى گانس زولمانن قازاقستاندا بيە ءسۇتىنىڭ شيكىزات بازاسىن قۇرۋدى ۇسىنعان بولاتىن.

ۇزاق ءومىر ءسۇرىپ، دۇرىس تاماقتانۋ ءۇردىسىن ۇستاناتىن جاپونياعا جوبا تانىستىرىلىپ، ماقۇلداندى. ولار زەرتتەۋ جۇرگىزىپ، ءونىمدى ساتىپ الۋعا ءازىر ەكەندىكتەرىن ايتتى.