قازاقستاندا اۆتوبۋستارعا بيلەتتەر ساتۋدىڭ ءبىرىڭعاي جۇيەسى قۇرىلادى

استانا. قازاقپارات - قازاقستاندا اۆتوبۋس رەيستەرىنە بيلەت ساتۋدىڭ ءبىرىڭعاي جۇيەسى قۇرىلدى.

ول تۋرالى كەشە و ك ق- ىندەگى بريفينگتە «تەحنولوگيالاردى كوممەرتسيالاندىرۋ ورتالىعى» ج ش س باس ديرەكتورىنىڭ ورىنباسارى ايزادا نۇرلىبايەۆا حابارلادى.

ونىڭ ايتۋىنشا، ت ك و قازاقستانداعى اۆتوبۋس رەيستەرىنە ەلەكتروندىق بيلەتتەردى ساتىپ الۋدىڭ ءبىرىڭعاي جۇيەسىن ىسكە قوسۋعا 18,1 ميلليون تەڭگە ءبولدى. جۇيە AparuBus  اتالادى. ول تولىقتاي وتاندىق ازىرلەمە.

«ءالى كۇنگە دەيىن كەرى قايتۋ بيلەتىن ساتىپ الۋ مۇمكىندىگىنسىز اۆتوبۋسقا بيلەتتەردى تەك اۆتوۆوكزال نەمەسە اۆتوستانسا كاسساسىنان ساتىپ الۋعا بولاتىن بولسا، ءبىزدىڭ AparuBus باعدارلامامىز بيلەتتەردى اگەنتتىك كاسسالارىنان، ۇيدەن شىقپاي-اق aparubus.kz ارنايى سايتىنان ساتىپ الۋعا مۇمكىندىك بەرەدى»، - دەدى ول.

AparuBus بيلەتتەردى تاسىمالداۋشىلاردىڭ وزدەرىنىڭ ساتىپ، ماركەتينگتىك ساياساتتى ايقىنداۋىنا جول اشادى.

«بۇگىندە تەحنولوگيا اۆتورلارى رەيستەردىڭ ەلەكتروندىق بازاسىن ۇلعايتۋدا. سوندىقتان اگەنتتىك كاسسالار وكىلدەرى ءبىزدىڭ ازىرلەۋشىلەرىمىزگە جۇگىنىپ، بيلەت ساتۋدىڭ وڭايلاتىلعان جۇيەسىمەن جۇمىس ىستەۋىنە بولادى. جوبانىڭ ماقساتى - قازاقستاندا اۆتوبۋس رەيستەرىنە بيلەتتەردى ساتۋدىڭ ءبىرىڭعاي جۇيەسىن قۇرۋ»، - دەدى ول.