س. احمەتوۆتىڭ قورعاۋشىسى سوتتا ونى اقتاپ شىعۋعا كۇش سالاتىنىن ايتتى

قاراعاندى. قازاقپارات - سىبايلاس جەمقورلىققا جول بەردى دەپ ايىپتالعان ەكس-پرەمەر-مينيستر سەرىك احمەتوۆ ايىپتىڭ بىردە-ءبىر تارماعىن مويىندامادى، قورعاۋشىسى ونى اقتاپ شىعۋعا كۇش سالماق.

بۇل تۋرالى ونىڭ ادۆوكاتتارىنىڭ ءبىرى نيكولاي لەسنيك حابارلادى.

«قورعالۋشىنى ايىپتاعان قىلمىستىق تەرگەۋ ورگانىنىڭ تۇجىرىمىن نەگىزدى دەپ تانىعان پروكۋراتۋرا ورگاندارىنىڭ ۇستانىمىمەن كەلىسپەيتىندىگىمىزدى ايتقىم كەلەدى. ولار وعان قاتىستى ءىستى سوتقا جىبەردى. قورعالۋشى تاراپ قاداعالاۋشى ورگانعا ءوز ۇستانىمىن بەرگەن شاعىمىندا بىلدىرگەن، ول قاناعاتتاندىرىلمادى»، - دەدى ن. لەسنيك.

ول ءوز ۇستانىمىن سوتتا ءارى قاراي قورعاي تۇسەتىنىن اتاپ ءوتتى.

«قورعالۋشىنىڭ كىناسىزدىگىن دالەلدەيتىن وبەكتيۆتى فاكتىلەر مەن ءمان-جايلار بار. ول سوتتا قارالادى. كەيىننەن ءىستىڭ ناقتى ءمان-جايى ەسكەرىلىپ، ءبىزدىڭ پىكىرىمىزدىڭ نەگىزدىلىگى راستالادى، وعان وزدەرىڭىز كۋا بولاسىزدار»، - دەپ قوستى ادۆوكات.

قاراعاندى وبلىسى قىلمىستىق ءىس جونىندەگى مامانداندىرىلعان اۋدانارالىق سوتتا 13- شىلدەدە كەلىپ تۇسكەن 300 تومنان اساتىن قىلمىستىق ءىس ازىرگە وندىرىسكە قابىلدانباعانىن ايتتى.

«ءالى ۇلگەرمەي جاتىر، ءىس اۋقىمدى. ءتيىستى مەرزىم 5 تاۋلىكتە (ق ر ق پ ك سايكەس) قابىلدانادى. بۇل تۋرالى ب ا ق- تا حابارلانادى»، - دەدى سوت كەڭسەسىندە.

قاراعاندى وبلىسى پروكۋراتۋراسىنىڭ باسپا ءسوز قىزمەتىنە سىلتەمە جاساپ حابارلانعانداي، قاداعالاۋ ورگانى بۇرىنعى پرەمەر-مينيستر س. احمەتوۆ، قاراعاندى وبلىسىنىڭ بۇرىنعى اكىمى ب. ابدىشيەۆ، قاراعاندىنىڭ بۇرىنعى اكىمى م. سماعۇلوۆ، تاعى دا باسقا بۇرىنعى شەنەۋنىكتەر مەن بيزنەسمەندەرگە قاتىستى قىلمىستىق ءىس ماتەريالدارىن زەردەلەۋدى اياقتادى. قىلمىستىق ىسكە بارلىعى 21 ادامنىڭ قاتىسى بار، ولار لاۋازىمدىق وكىلەتتىلىكتەرىن تەرىس پايدالانعانى، بيۋدجەت قاراجاتىن جىمقىرعانى، كاسىپكەرلىك قىزمەتكە زاڭسىز قاتىسقانى ءۇشىن ايىپتالۋدا. س. احمەتوۆكە ءىرى كولەمدە پارا العانى ءۇشىن ايىپ تاعىلدى.

«2015-جىلعى 13- شىلدەدە ءمانى بويىنشا قاراۋ ءۇشىن جوعارىدا اتالعان تۇلعالارعا قاتىستى قىلمىستىق ءىس قاراعاندى وبلىسى بويىنشا قىلمىستىق ءىس جونىندەگى مامانداندىرىلعان اۋدانارالىق سوتقا جىبەرىلدى. ايىپتىلار سوتقا تاپسىرىلدى»، - دەپ حابارلادى وبلىس پروكۋراتۋراسىنىڭ باسپا ءسوز قىزمەتىنەن.

تەرگەۋ نۇسقاسى بويىنشا، س. احمەتوۆ 1 ميلليارد تەڭگەدەن استام بيۋدجەت قاراجاتىن قىمقىرىپ، 500 ميلليون تەڭگە كولەمىندە پارا العان.

ەسكە سالساق، س. احمەتوۆ سەگىز ايدان بەرى ءۇي قاماقتا. تەرگەۋ وقشاۋلاعىشىندا سوتتى تاعى بەس ادام كۇتۋدە. سونىمەن بىرگە تۇتقىندا وبلىستىڭ بۇرىنعى اكىمى ب. ابدىشيەۆ، قاراعاندىنىڭ بۇرىنعى اكىمى م. سۇماعۇلوۆ بار. قالعان قاتىسۋشىلارعا قاتىستى قوعامنان وقشاۋلاۋدان تىس بۇلتارتپاۋ شارالارى قابىلداندى.