الماتىدا ەسىنەن تانىپ قالعان اۆتوبۋس جۇرگىزۋشىسى ءۇش كولىكتى سوقتى
پوليتسيا قىزمەتكەرلەرىنىڭ حابارلاۋىنشا، اۆتوبۋس جۇرگىزۋشىسى جول ۇستىندە ەسىنەن تانىپ قالعان.
«ءۇشىنشى شاعىن اۋدان» ايالداماسىنان كەيىن اۆتوبۋس وڭتۇستىك باعىتتا قوزعالىسىن جالعاستىرا بەرگەن. سول باعىتتا قوزعالعان ول كىدىرمەستەن Audi, Volkswagen Touareg, Toyota Camry كولىكتەرىن سوققان. ەسىن جيعان سوڭ جۇرگىزۋشى قوعامدىق كولىكتى كوپىردىڭ قورشاۋىنا جاقىن توقتاتقان.
GPS- ناۆيگاتسيانىڭ مالىمەتىنشە، اۆتوبۋس ساعاتىنا 33 كيلومەتر جىلدامدىقپەن جۇرگەن. جول-كولىك وقيعاسىنان زارداپ شەككەندەر جوق.
«الماتى ەلەكترو ترانس» ج ش س كولىكتەرى «اليانس پوليس» ساقتاندىرۋ كومپانياسىمەن ساقتاندىرىلعان.
قازىر وقيعانىڭ جاي-جاپسارىن جول پاترۋلدىك پوليتسيا قىزمەتكەرلەرى انىقتاپ جاتىر.
اۆتوپارك وكىلدەرىنىڭ ايتۋىنشا، كۇن سايىن رەيسكە شىقپاي تۇرىپ جۇرگىزۋشىلەر مەديتسينالىق تەكسەرۋدەن، كولىكتەر تەحنيكالىق تەكسەرۋدەن وتەدى. اۆتوبۋس جۇرگىزۋشىسىنىڭ 33 جىل ەڭبەك ءوتىلى بار. ول كۇنى دەنساۋلىعىنان ەشقانداي كىنارات بايقالماعان.
دارىگەرلەر ونىڭ اپتاپ ىستىقتان ەسىنەن تانىپ قالۋى مۇمكىن ەكەندىگىن جوققا شىعارمايدى.
اۆتور: گۇلميرا عوسمانالي
