مەشىتتەگى «تۇنگى اكسيادان» قۇر قالماڭىز
سونداعى ساۋداسى: ءبىر زات الساڭىز - ەكىنشىسىن جارتى باعاسىنا ساتىپ الاسىز. قاراقۇرىم حالىق، ىعى-جىعى جۇرت. تۇنگى ەكىگە دەيىن بارساڭىز - ۇلگەردىڭىز، ايتپەسە اكسيادان قۇر قالادى ەكەنسىز.
پەندەمىز عوي، كەيدە وسىناۋ بولماشى جەڭىلدىكتەر ءۇشىن جەلپىنىپ، جەتىپ باراتىنىمىزدى نەسىنە جاسىرامىز؟! ول دا دۇرىس قوي، تۇرمىس ءۇشىن، ءومىر ءۇشىن قاجەتتى زاتتاردى الۋعا ءتيىسپىز.
ءبىزدىڭ ايتايىن دەگەن وي باسقا ەدى. ادام بالاسىنا جىلىنا ءبىر رەت كەلەتىن، ەكى دۇنيەنىڭ قايىرلى ءساتى - رامازان، ونىڭ ىشىندەگى قاسيەتتى قادىر ءتۇنى. ناعىز جەڭىلدىك، ناعىز جەتىستىك، ناعىز جەڭىس، مىنە، وسى - قادىر كەشى. ارينە، جاراتقاننىڭ قادىر تۇنىندەگى جارىلقاۋىن، جەڭىلدىگىن الگىندە ايتقان ساۋدا دۇكەنىنىڭ جەڭىلدىگىمەن ياكي تۇنگى اكسياسىمەن سالىستىرۋ سانامىزعا دا كەلمەگەن.
ءبىزدىڭ نيەت - قادىر تۇنىندەگى مول مۇمكىندىكتەن، تەڭدەسسىز ساۋاپتان، شەكسىز نىعمەتتەن، ءبىر پەندەنىڭ بۇكىل ومىرىنە تاتيتىن قۇلشىلىقتان قۇر قالماۋعا ۇندەۋ. راسىندا، قادىر كەشىنىڭ ءاربىر ءساتى قادىرلى.
پايعامبارىمىزدىڭ (اللانىڭ وعان سالاۋاتى مەن سالەمى بولسىن): «اللا تاعالانىڭ مىڭ ايدان قايىرلى ءتۇنى بار، كىم سول ءتۇننىڭ ساۋابىنان، جاقسىلىعىنان شەت قالسا، بارشا ساۋاپ، جاقسىلىقتان قۇر قالادى»، - دەپ، بۇل ءتۇندى بەيقامدىقپەن وتكىزبەۋدى ناسيحاتتاۋىندا ۇلكەن ءمان بار.
قاسيەتتى قۇراننىڭ العاشقى اياتى تۇسە باستاعان، تۇندەردىڭ تورەسى - ءقادىر كەشى - مىڭ ايدان دا قايىرلى. بۇل تۇندە پەرىشتەلەر جەرگە ءتۇسىپ، جەر بەتىندە بەرەكە ورنايدى. جۇرەكتەرگە يمان ۇيالاپ، ادامزات بالاسى ەرەكشە ىزگى سەزىمگە بولەنبەك.
پايعامبارىمىز مۇحاممەد (اللانىڭ وعان سالاۋاتى مەن سالەمى بولسىن) وسيەت سوزىندە: «اللا تاعالا قادىر ءتۇنىن مەنىڭ ۇمبەتىمە سىيلىق ەتىپ بەرگەن. مۇنداي نىعمەت بۇرىنعى ۇمبەتكە بۇيىرماعان»، - دەپ، بارشا مۇسىلمان قاۋىمىنا ءسۇيىنشى حابار جەتكىزگەن.
بۇگىن قادىر كەشىندە مەشىتتەرىمىزدە ۋاعىز ايتىلىپ، كوپشىلىكپەن ناماز، قۇران وقىلادى، جاماعاتپەن دۇعا جاسالادى. كەيبىر مەشىتتەردە، ماسەلەن، ەلوردامىزدا ەلىمىزدىڭ باس مەشىتى - «ازىرەت سۇلتاندا»، «نۇر استانا»، «س. عىلماني» مەشىتتەرىندە قۇران حاتىم جاسالادى.
اللا ۇيىنە كەلىپ، جاماعاتپەن بىرگە جاقسىلىققا، ىزگىلىككە بولەنىپ، دۇعا جاساۋ - ابزال امال. قادىر كەشىن ىزگى امالدارمەن ۇيدە دە وتكىزۋگە بولادى.
ءيا، رامازان - ۇلى نىعمەتكە بولەنەتىن كەز. مەشىتتەگى يگى شارالاردان، سالىستىرمالى تۇردە ايتقاندا، «تۇنگى اكسيادان» قۇر قالماۋعا شاقىرامىز.
اللا بارشامىزعا جار بولعاي!
اعابەك قونارباي ۇلى، قازاقستان مۇسىلماندارى ءدىني باسقارماسى باسپا ءسوز ءبولىمىنىڭ مەڭگەرۋشىسى
